2 Corinth 12 - Pupu Oharo Āre 1963 Genese 1970 Rute 1972

Ivahi oharo: Mahuka eharu uku

¹ Ara pelaea hovea leikive, veveke ka. Ara va Amua ve la ivahi oharo hukavakilai.

² Ara haela ae ore leipe, overa hoa, hitolo 14 karia le leipe (maea hiki la, aka iki ureve ka lai la, ara va ore va ka, Aualari hiki ore.) Lahovea haela kaia akea pekape hovea.

³ Ara lahovea haela ore leipe (maea hiki, aka iki ureve hiki la, ara haveva, ore Aualari hiki.)

⁴ La haela Aualari Paradise lai pekape. Are hehe iele oharo iapape, la oharo meahaiapo haela hukavakive hovea ka, pupu eapapo iele.

⁵ Ara lahovea haela morapaeakive, heroe, ara elare morapaea va ka, aka arave kakare oaria v'ila leia hiki ara morapaeakilai.

⁶ O iele, ara va elare morapaeakive ikivere la leikilava, ara ikihaveva mai lei va ka: ara o iele arilai. Aka ara la oharo e va ka, haela oaria arave oharo iapai maria kekelaki ave, ara elare maea pelaea hiki leivila.

⁷ Laelave, Aualari araro meahaiapo ve heraho aea avikiarape, ara ivahi mekaka v'ila pelaea leiki ave. Are Satan ve eharu heaha araro kai paraeape, ehovea araro hararuakive, ara iki veveke eapapo lei pelaea eapapo leiki ave.

⁸ Ma heraho v'ila ara hoa ilehoila Amua hareavakive apevelavela leipe.

⁹ Aka are kavale maeape, Arave ikiheroe meru hiki ava heroe: Arave aheke mahuka ve oki ara mekakure leikilai. Laelave ara va ikiveveke ila la kakare oaria morapaeakilai, ehovea Keriso ve aheke araro aerakilai.

¹⁰ Laelave kakare oaria, haela ve o heaha, heraho hoa, haela araro hararuaki hoa, ikiheraho hoa oaria kara, ehovea Keriso ve harihari, ara ikiveveke leivila; ehovea ara va mahuka la leikilava, o iele ara aheke le leikilai.

Paul elare pelaea lei ehoe leivila

¹¹ Ara va pelaea mai v'ila ikihaveva hovea leipe, ehovea eve haeae: ehovea e va arave rare lei veveka au leila. O iele, arava ipi iele haela, aka arave akea iele la aposetolo haela, ere va arave oropa va ka.

¹² O iele, arave aposetolo haela mai eve oropa ve leivahaeape: auhohi leiki mai, aheke iele, ihova mekakure i horova ehoaha ila.

¹³ Ehovea e va ekalesia aea ve ipi ve learia leivahaeape ha? Maria hiki, ara ero ara v'ila mehau au avaraila. Arave ma heaha hela hapururukaki.

¹⁴ Iapaila: Hoa ilehoila ma ara va ikivere eve leia aukive. Ara ero lei heraho leivahaea va ka: ara eve eharu ikivere lei va ka, ara va ikivere e hiki. Ehovea akoremari ereve oa i lou ila ve eharu kiva leve leikive. Oa i lou ila ereve akoremari v'ila eharu kiva leikive heroe.

¹⁵ Ara va ikiveveke ila arave eharu i maea ila hareho e v'ila horova leikilai. Aka ara ero ikiheheroe eapapo la leivahaeakilava, e va araro ikiheroe perehekai leikilai ha?

¹⁶ Lae vi va, ara ara v'ila ero heraho au leila. Aka ara hehepo iele, laelave ara ero au amuraeape ha?

¹⁷ Ara eve leia paraeape haela v'ila erohoho uku koarape ha?

¹⁸ Ara Titus velavela leipe eve leia aukive. Ara apoheari aea kara are i hareho paraeape. Titus eve leia erohoho koarape ha? Elalila ve okiharo hoveahovea au leila ha?

¹⁹ Oharo aeka ma: eve ikikekela ela eve hahaki oharo kavale maearo ha? Elave oharo Keriso v'ila, Aualari oropa ve, aka ela va horova oaria leilula, apavara, ehovea ero lei aheke leivahaeakive.

²⁰ Ehovea ara va oaoka leivila, ara eve leia auki la hoa, ara ero hoveahovea apeakive eava va ka. E kara araro eavaki la hoa, e kai araro ikihairihairi leiki ave. Ara va oaoka leivila, ara eve leia, oharo hahari, ikiheaha, hihiri, hahari, o vere oharo, avako haopaki mai, pelaea mai, kai naoae naoae mai oaria koaraki ave.

²¹ Ara oaoka va la, ara eve leia hoa aeka laukilava, Aualari eve oropa ve araro maea makiri leiki ave. La hoa ara haela oaria ve mai heaha v'ila hi eapapo arilai. Mai hahaeae, korea mai i opore mai oaria ve ikihuru leivahaeaki aue la haela oaria v'ila, ara va ikihuru eapapo leiki ave.