2 Corinth 11 - Pupu Oharo Āre 1963 Genese 1970 Rute 1972

Paul va Aposetolo haela iele

¹ Aualari ve oropa ve, ara va ikivere e arave ma oharo iapai kelavaki — ikiheroe hela, arave oharo iapaki:

² Ehovea ara e v'ila Aualari oropa ve ikivere havahu iele. Ehovea ara ero vila haroapo maepakive hovea avarape: ara va ikivere ero veveroro ila Aualari aiarakive.

³ Aka, ara va oaoka, e ve la iki veveroro mai hakurepaki ave, ekaroa Eva le kurupaeape hoveahovea.

⁴ Eve leia pekaki la haela, are va Iesu lahua la kileakilava, ela au kileaila la Iesu aea; aka e overa au availa Ove e la avakilava, aka iroro lahua la iapakilava, overa au iapaila la iroro oharo: heroe, areve la oharo iapaila.

⁵ Arave ikikekela ara va aposetolo haela oaria aire va ka.

⁶ Arave hukavaki oharo mekaka havahu ka, aka ara ore leipe la oharo mekaka hiki. Ela ka eharu oaria v'ila eve oropa ve hihika iele leivahaeape.

⁷ Ara maeoka leipe ehovea ero lei morapaeakive! Ara leia ve haeae leipe ha? Ehovea ara ehoe hiki eve oropa ve Aualari ve iroro oharo veveke ape.

⁸ Ara eve horova leipe la hoa, hoveahovea ara ekalesia ae ve eharu veveke hovea lei ero aiarape.

⁹ Ara e i hareho aeape la hoa arave ikivere eharu ero velavela au leila. Ehovea Macedonia ve ekevahaeape la ekalesia arave ikivere leivahaeape eharu araro aikiarape. Ara kai mea oaria arave eharu v'ila ero heraho au leila. Lahovea ara mea oaria arave maea kiva leikilai.

¹⁰ Keriso ve o iele arave iki ureve aeavila, laelave ara ma oharo Achaia ita oaria hihika arilai, haela araro hereava va ka.

¹¹ Ehovea leve? Ehovea ara ero ikiheheroe leivahaea va ka ha? Aualari hiki ore.

¹² Aka, ara va ikivere hovea, ara leikilai: ara pelaea leikive ikivere la haela ve oki kokaukakive, ehovea ereve ikivere haela erero elave ikiore hoveahovea rare arilai.

¹³ Ehovea lahovea haela va opore aposetolo haela, ere va hehepo leilula haela, ere va ikivere Keriso ve aposetolo haela rare avakive.

¹⁴ O iele, ehovea Satan kara elare maea ovava ve aneru hovea koelaripe.

¹⁵ Laelave — ela va horahora va ka ehovea areve horova haela mai ehoe haela hovea hovea leilula. Ereve aireaki hoa ereve horova ve kavale hoveahovea ere aeakilai.

Paul i areve iri haela ila

¹⁶ Ara aeka ero maeaeaive — haela ae araro ihape hovea kekela va arekaea. Eva araro ihape rare la maeakilava, heroe, ehovea ara elare maea pelaea leikilai, heroe.

¹⁷ Ara maeaivila ma oharo, ara Amua ve rare v'ila maea va ka, aka ihape haela hovea, ehovea ara are v'ila pelaea leivila.

¹⁸ Uku haela aivau v'ila pelaea leilula — ara kara laria leikilai.

¹⁹ Ehovea e va ikiore haela, laelave e va ikihaveva haela auhohi leilula.

²⁰ Ehovea haela ero haeae kari laukilava, eve eharu laeakilava, eve oropa ve pelaea la leikilava, eve oropape la koakilava, e va arero auhohi leilula.

Paul ve heraho i kakare ila

²¹ Ara maeoka ila oharo hukavavila, elare maea mahuka hovea leivila. Lae vi va, haela ae iki aheke la leikilava, ara kara aheke leikilai.

²² Ere va Hebrew haela ha? Ara kara! Ere va Israel haela ha? Ara kara! Ere va Abraham ve meavohula ha? Ara kara areve meamori.

²³ Ere va Keriso ve horova haela ha? (Ara ikihaveva haela hovea). Ara va ereve akea ve. Ara va horova oaria iele: ara va mea oaria haru avape, ara va uvi muru hoa oaria, hoa oaria apaki maea iele.

²⁴ Jew haela hoa hue ila araro haru koavape, hoa haroapo haroapo va haru 40 i haroapo karia.

²⁵ Hoa ilehoila ere araro pae haru hape. Hoa haroapo ere araro have koavape — hoa ilehoila ara hahi leipe la vevaea ma ihaupe. Ara va oroa i hare ila ahea ma ureve aeaveape.

²⁶ Hahi oaria, ahea ma hihi ve, heraho hoa oaria, korea haela araro hararuape: ara havahu ve ita haela araro hararuape: karikara hihi i huakara ila ara va heraho leipe — ahea ma ve heraho, opore apavara, opore hararuape mai, ara hoa oaria ore leipe.

²⁷ Ara maea mahuka i maea kakare ila leipe, oroa ve ovokake, eroa hape, ma karave koa hape, ere kai aeape hoa ka oaria: Ara maea vevehere i maea maheare leipe.

²⁸ La va maea ve eharu. Aka eharu aeva ma: hare oaria ekalesia kiva leikive la horova.

²⁹ Leita haela mahuka ha? Ara va mahuka va ka ha? Leita haela hilaukilai ha? Ara kai hilau va ka ha?

³⁰ O iele, ara pelaea la leikilava, arave mahuka hihika leilula la eharu v'ila ara va pelaea leikilai.

³¹ Elave Amua Iesu Keriso ve Oa Aualari, areve rare lei morapaeaki: Are v'ore arave oharo iele.

³² Damascus karikara leia amua Aretas ve gavana haela kiva auhohi leipe, ehovea araro mai paeakive.

³³ Aka ere araro hara ureve paraeai āra okiape hekai ve avihoaupe, laelave haela araro au paeaila.