2 Corinth 10 - Pupu Oharo Āre 1963 Genese 1970 Rute 1972

Paul o iele Aualari ve paraeape haela

¹ Ara, Paul, ara havahu ero ape karava maeaeaive, Keriso ve iki maraha i ikihuru v'ila: Ara va eve leia aeavila hoa ara va ipi iele haela, aka apehai ve ara ero ape karava maeaeaive.

² Ara ero here leive, — ara eve leia pekaki hoa, ara va ero ape aheke leve kai maeaeakive. Aka ara va ikivere ara uku haela aihukamaeakive, ehovea ere va araro iki kekelalula hoa araro maea ve horova hiki ikivere rare arula.

³ Ehovea elaviila meahaiapo ve loalula, aka ela va meahaiapo ve la hahari hovea leivahaea va ka.

⁴ Ehovea elave mare leiki eharu va meahaiapo eharu ka, aka, ela va aheke mare haela ve uvi aheke kopararapakive hovea.

⁵ Ela va ikikekela haeae i Aualari ve ikiore hahari leilula la eharu haivavarukapailula: ela va ikikekela oaria Keriso ve iapa mai hovea leilula.

⁶ Ela va iapaki aue haela aihukamaeakilai, e va iele iapakive la hoa.

⁷ E va eharu auhohi eavaila. Haela ae ve ikikekela are va Keriso ve haela, heroe — are ore maria leikilai, ela kara Keriso ve haela hovea.

⁸ O iele, Aualari araro aheke avikiarape ehovea ero lei aheke leivahaeakive. Ara va la aheke v'ila pelaea la leikilava, ara haeae lei va ka: are va ero lei hihilauki aheke va ka.

⁹ Ehovea ara ikivere va ka arave hohoa ve oki ero lei oaoka leivahaeakive.

¹⁰ Ehovea uku haela maria arula, Areva oharo mehau i aheke ila haeavila, aka areve maea va mahuka, areve hukavaki mai kara hovea ka.

¹¹ Lahovea haela maria iapaki — ela va apehai ve paraeaki la oharo, ela va aireaki eve leia pekaki hoa hoveahovea hukavakilai.

¹² Ehovea ela ikivere ka elare maea pelaea hovea leikive, uku haela ve maea pelaea hovea. Ehovea ere elare hiki kelavalula, kai elare maea pelaea leilula, aka ikiore iele leivahaea va ka.

¹³ Ela havahu elave maea hovea naoae naoae pelaea leivahaea va ka, aka Aualari elaro aikiarape la ihova hovea ela kai ero aiarakilai.

¹⁴ Ehovea ela elare ihova heaorapa va ka — ela va ero leia la ihova aiarape. Ela eve oropa Keriso ve iroro veveke ape iele va la.

¹⁵ Ela va elave horova hovea hiki ve oharo hukavalula, haela ae ve horova va ka. Aka ela va ikivere eve ikikekela aheke leiki la hoa ela e v'ila eapapo leikilai.

¹⁶ Ehovea ela va ikivere eve leia hiki ka, aka apehai la ita ve kara, ela iroro arilai. Ela va haela aea leipe horova v'ila pelaea lei va arekaea.

¹⁷ Aka pelaea ikivere la haela are va Amua v'ila pelaea leikive heroe.

¹⁸ Ehovea elare horova morapaeaki la haela va hovea hovea lei va ka: Amua morapaeaki la haela hiki.