2 Corinth 1 - Pupu Oharo Āre 1963 Genese 1970 Rute 1972

Ikiheroe oharo i thankyou oharo ila

¹ Ara, Paul, Aualari ve ikivere leipe Iesu Keriso ve aposetolo Haela, kai elave apoheari, Timothy, kara, elalila ve oharo ma. E Aualari ve Corinth apealula la ekalesia haela i Achaia ve hehe haela oaria ila, ikiheroe hela.

² Elaviilave Oa Aualari i Amua Iesu Keriso ila ve ikiheroe meru ve havila e i hareho apeaki.

³ Elaviilave Amua Iesu Keriso ve Oa Aualari, ikihuru Oa iele, kai hakakaeaki Aualari iele, morapaeaki.

⁴ Elave heraho hoa are elaro mea oaria hakakaivila, laelave ela va heraho leilula la haela hukapakive ore, Aualari elaro auhohi hukapape la mai hovea hovea.

⁵ Ehovea ela va Keriso v'ila kakare oaria koarailula, laelave Areve ikihuru oaria kara elaro hukapaivila.

⁶ Ela va heraho leivahaelula, ehovea ero ikiveveke lei makukurikive. Laelave, e kara elave la kakare hovea hovea la koarakilai, e kara aheke apeakilai. Elaro halakakaeakilava, e havahu kara laria lei veveke leivahaeakilai, kai lei hakakaeakilai.

⁷ Ela kara eve oki ve ikiveveke leilula, ehovea ela v'ore, e va elave heraho herehere leilula, laelave e va elave ovokake kara herehere leivahaeakilai.

⁸ Ehovea ela va ikivere ka, apavara e, ela va Asia koarape la kakare e haveva leivahaeakive. Ela va leia heraho eapapo leivahaeape, ela va aheke havahu au leivahaeaila, ela va apihaeaki maea iele.

⁹ O iele, ela va iki ureve apihaeakive oharo overa kelavape, laelave ela va elare aheke iki au kelavaila, aka apihaealula haela lai urahukaki la Aualari ve aheke hiki.

¹⁰ Are elaro la heaha ve lei makukuripe, aeva mea oaria laria leivila. Elave ikikekela Are elaro lei makukurikilai.

¹¹ E kara eve ivaiva v'ila elaro hela hukapaila, laelave haela oaria, thank you oharo a ivaiva oharo avahaealula, ehovea Aualari elaro leivahaeape la ikiheroe eapapo.

Paul ve ikivere ehoe

¹² Elave ikiveveke maria: Ela va iki ure ore, meahaiapo haela ve oropa ve, kai eve oropa ve, ela va hehe mai i iki ehoe ila, horova veveke leivahaeape, aivau ve la ikiore mai va ka, aka Aualari ve la ikiheroe mai.

¹³ Ehovea e mureai kai ore leiki la eharu hiki ela mave haeairo: ara ikivere e va maria kelavakilai aiai karia leiki hoa.

¹⁴ E va laria iki overa kelavaila, e va ela v'ila iki veveke hoveahovea, ela kara e v'ila ikiveveke leivahaeakilai, Amua Iesu ve hare la.

Areve hahi aireaki leiki oharo

¹⁵ Ara maria ikiveveke lei eve leia hahi leikive kekelape, ehovea ero kai hoa orahokaila lei mekaka leivahaeakive.

¹⁶ Ara va ikivere eve la oki aiai Macedonia kara pekakive: Aeva Macedonia kai hakurepai eve la oki kai ekekilai. Eve leia hakurepaki la hoa Judea havahu kilaukive.

¹⁷ Ara laria naoae naoae kekelape ha? Ara va ikivere horova ara meahaiapo haela hovea kekelape ha? Ara va eara hiki au eila, ara va Arekaea oharo hiki au eila ha?

¹⁸ Aualari oropa ve elave eara va iele havahu, kai elave arekaea kara laria.

¹⁹ Ehovea Aualari ve Akore, Iesu Keriso, ara i Silvanu i Timotheus ila eve leia iroro avahaeape la rare, are kara eara au hiki au eila, are va eara va iele havahu ape.

²⁰ Ehovea Aualari areve oki ve ape la okoare oaria va iele: laelave elave oki ve elaviila Aualari ve rare momorapulula iele havahu.

²¹ Elaviilara hareho Keriso ve oki ve lei aheke lei hehe leivahaeape la haela va Aualari iele.

²² La Aualari, are elaro areve ihova leipe, aeva areve Ove ve ihova elave iki ureve aipepe.

²³ O iele, ara Aualari oropa ve ero maeaeaive — Ara va ero ikihuru leivahaeape, laelave ara va elavelave Corinth leia hahi au leila.

²⁴ Ela va eve ikikekela v'ila pelaea leivahaea va ka: ela va e i hareho ikiveveke leilula: ehovea eve ikikekela ero lei aheke leivahaeavila.