1 Timothy 6 - Pupu Oharo Āre 1963 Genese 1970 Rute 1972

Horova ve hahape haela

¹ Haela ae ve horova leilula la haela oaria iki auhohi kelavaki: ereve haelapo ve oharo iapai leivahaeakive va heroe. Aualari ve rare i kileaki oharo ila haela o heaha maeaeaki ave.

² Keriso ve okiharo ikivere leilula haelapo ila la horova haela erero hahaure leivahaea v'arekaea, ehovea ere va apavara. Ere la haela koarakive heroe, ehovea ere va iki kelavalula i ikiheheroe leilula haela.

Kilea oharo haeae

³ Haela ae oharo lahua la kileakilava kai elaviilave Amua Iesu Keriso ve oharo i Aualari ve mai ehoe ila la kileaki oharo ikihairihari la leikilava —

⁴ Are va pelaea haela, are va oharo iele haveva; are va naoae naoae oharo hukavavila haela — leia ve kihoreraki eharu va Ikiheaha, hahari, o vere oaria, ikikekela haeae.

⁵ Ikikekela haeae haela ve oharo hahari, o iele karia, ereve ikikekela Aualari ve mai va eharu oaria aeaki okiharo: Ma haela hahaure leiki va heroe.

Erohoho iele

⁶ Aka Aualari ve mai veveke ve okiharo va ikiveveke leiki okiharo kara.

⁷ Ehovea elaviila meahaiapo aikihoahukape eharu va karia. Iele havahu, elaviila meahaiapo hakurepaki hoa kara eharu aihoahuka va ka.

⁸ Elaviila eapai i pura ila: elaviila leia v'ila hoveahovea.

⁹ Erohoho oaria ikivere leilula haela amuraeaki hoa hihilaukakilai. Ere va mai haeae oaria leivahaeakilai, aiai ere heaha havahu le koarakilai.

¹⁰ Ehovea erohoho ikivere mai va mai heaha oaria ve ipi ve; uku haela laria leivahaeape, laelave ere va ikikekela mai veveke hakurepape. Ere kara heraho oaria koarai ikikakare le leivahaeape.

Lei aheke leiki oharo

¹¹ Aka, a va Aualari ve haela. Ma mai heaha oaoka lei hukaukive heroe. A va mai ehoe i Aualari ve pupu oaria ila, kai ikikekela veveke i ikiheroe ila, kai haharihahari maeoka mai ila ikivere leiki.

¹² Ikikekela veveke ve la mare veveke arive. Ovokake iele ikivere leiki, ehovea aro itavape iele la. Aeva a haela oaria oropa ve la okoare maeape.

¹³ Aualari va eharu oaria lei ovokake leivahaevila: Iesu Keriso va Pontius Pilate oropa ve oharo iele vavavape. Ara la Aualari i Iesu Keriso ve oropa ve ahilave:

¹⁴ A va ma pupu kiva auhohi leikive, haeae karia, aiai elaviilave Amua Iesu Keriso kihorerakilai.

¹⁵ Are va la ihova areve ikivere hoa hihika leikilai, ehovea are amua oaria ve Amua, akea iele ve Amua.

¹⁶ Are hiki ovokake iele ila, areve aeaki la ita ve ovava haela oaria maeamaea pekahava va ka. Haela oaria Aualari au eavaila, kai eavakive hoveahovea leivahaea va ka. Areve rare va aheke i haharika ila aiai karia lei va ka, Amene.

¹⁷ A va erohoho oaria haela ahilaki, ere va pelaea kalaivahaelue, kai erohoho eharu hiki kelava va arekaea. Aka ovokake Aualari ikikelavaki, ehovea eharu oaria are elaviilara aikiaravila.

¹⁸ Erero ahilaki — ere ikiheroe mai leivahaeaki, horova veveke leivahaeaki, eharu herehere mai ikivere leivahaeaki, elare hiki v'arekaea.

¹⁹ Laria ere va aireaki ovokake hoa ve erohoho oaria iele havahu koarakilai, ehovea ere va aireaki la Ovokake Haiapo Iele le avakilai.

²⁰ Timothy e, aro avarape la O iele kiva hela leikive. O heaha kai naoae naoae oharo oaria kai opore ikiore hahaure havahu leiki.

²¹ La ikiore ikivere leivahaeape haela uku ikikekela haeae le leivahaeape. Ava ikiheroe meru avaki.