1 Timothy 5 - Pupu Oharo Āre 1963 Genese 1970 Rute 1972

Ekalesia uavila maitava ve okiharo

¹ Oropa haela ka ererealue: arero oa hovea kekelaki. Haela āre oaria ave apoheari hoveahovea kekelakive.

² Uavila hoaha ave lou hovea hovea leivahaeaki, uavila āre va malaita hovea; iki ehoe kekelaki.

³ Uavila maitava iele momorapuki.

⁴ Aka akoremari ila la uavila maitava, veveke ere elare ita oropa mai ehoe leivahaeaki, kai ereve oa i lou ila kiva leivahaeakive, ehovea Aualari va ikivere iele laria mai veveke.

⁵ Maitava iele la uamari, merava hovea, are Aualari ikikekelakive heroe — are va maea oaria ivaiva mai, hare i oroa ila, kiva lei va heroe.

⁶ Aka meahaiapo ikivere mai hiki leivila la uva maitava, areve ovokake iele karia.

⁷ Aeka erero ma oharo pupu hovea kileavahaeaki, ere va haeae leivahaeaki ave.

⁸ Elare apavara kiva leiki aue la haela, o iele are havahu ve lalava haela kara, la haela are va Aualari ve pupu ve haeae le leipe: are va ikikekelaki aue haela hovea.

⁹ Ekalesia haela kiva leilula uva maitava hiru rare haeaki uavila va uavila hoaha hiki, hitolo 60 hovea, vila haroapo hiki laeape la uamari.

¹⁰ Hari veveke la uavila hiki, ehovea ereve horova veveke. Are akoremari kiva leivahaeape, aka hahi haela kiva leivahaeape, aka hehe haela ve loa huhelavape, heraho haela koarape, horova veveke oaria kiva leivahaeape la uavila hiki hoveahovea.

¹¹ Aka uavila maitava āre v'arekaea, ehovea uku ere va Keriso ve rare naoae naoae leivahaeape — la hoa vilaita erero karakilai, heroe:

¹² Ere va heaha leivahaeakilai, ehovea ereve ikikekela haeae leivahaeape.

¹³ Aeka, ere va horova iele leivahaea va ka, ere uvi lahua lahua naoae naoae loa loalula: ere kai oharo naoae hukavalula, kai oharo opore i haeae ila hukavalula.

¹⁴ Laelave ara va ikivere uavila maitava āre vilaita karakive, heroe, akoremari erakive, uvi horova kiva leivahaeakive, aeva elaviilave iri haela oaria oropa ve rare heaha ava v'arekaea.

¹⁵ Ehovea uku Satan ve ukaki overa helarivahaeape.

¹⁶ Laelave leita ekalesia haela va apavara uavila maitava ila, are va erero kiva leivahaeakive heroe, ekalesia hoa haroapo v'arekaea. Ereve horova apavara karia la uavila maitava hiki.

Haela Hoaha

¹⁷ Kiva horova veveke leilula la haela hoaha eapapo momoru?-?pakive heroe: o iele havahu iroro oharo i kileaki horova arula la haela:

¹⁸ Ehovea buka oharo maria hape, Wheat hae loa haipepekaki la boromakau ve ape kokakaukaelue. Aeka: Horova haela are va horova kavale hovea hovea.

¹⁹ Haela hoaha ve hahaki oharo elavelave ka iaparue; meu haela orahokaila aka ilehoila hiki arero hahakive hovea.

²⁰ Mai haeae leilula la haela, haela oaria ve oropa ve aihukamaeakive, haela oaria la haeae oaoka leivahaeakive, heroe.

²¹ Aualari i Iesu Keriso ila, kai hehe aneru ila oropa ve, ara aro ahilave, a va ma mai kiva leikive: haela haroapo haela oaria oropa ve ikivere kalailue, haela oaria hovea hovea kekelakive.

²² Haela ae elavelave mai kapaealue, kai haela ae ve mai heaha koara v'arekaea: Mai veveroro hiki kiva leiki.

²³ Ma koa hiki le va ka, aka wine perepere larilai, heroe, ehovea eharau lei veveke leikive, aeka ehovea ave maea kakare hoa.

²⁴ Uku haela ve mai heaha elavelave hihika leilula, ehovea hahaki horova overa: uku va aireaki hihiki leivahaeakilai.

²⁵ Laria kara, uku haela ve horova veveke haela ae ore elavelave leivahaelula, aka aireaki hare la haela, haela erero ore leivahaeakilai.