1 Timothy 4 - Pupu Oharo Āre 1963 Genese 1970 Rute 1972

Kilea haela haeae ve oharo hereavakive

¹ Iapai, Ove ve oharo hihika maria ape — aireaki hoa uku haela ikikekela ve la mai ve titavakilai. Ere va amuraeaki oharo haeae iapakilai, kai diabolo ve kileaki oharo haeae kara.

² Ereve la kileaki oharo opore iele, ehovea ereve iki ureve haeae leivahaeape.

³ Ere va uva laeaki aue oharo kilealula: ere va aivau haure leikive oharo kai kilealula, Aualari karikipe la aivau, ehovea ikikelavalula i o iele ore la haela oaria iki veveke ila lalavahaeakive.

⁴ Ehovea Aualari karikivahaeape eharu oaria mekaka hiki. Elaviila hahaure leivahaea v'arekaea, elaviila va ikiveveke ila aeakilai la eharu.

⁵ Ehovea la eharu va Aualari ve oharo i ivaiva ila mekaka le leivahaeape.

⁶ A va ekalesia haela ma oharo la kileavahaeakilava, a va Iesu Keriso ve horova haela veveke leikilai, ehovea ikikekela ve oharo iele aro lei aheke leipe. La ikikekela mai a ore overa leipe.

⁷ Aka heaha i naoae naoae la oharo ka iaparue: Lou‐oharo hiki kekela v'arekaea. A va iki ehoe i hehe mai ila kiva leikive.

⁸ Ehovea maea ve horova ve iele eapapo ka, aka iki ureve la horova veveke havahu iele, ehovea are va ma hoa ovokake aheke leikilai, kai aireaki la ovokake hovea hovea leikilai.

⁹ Ma oharo va iele, arero iele eapapo lei va heroe.

¹⁰ Elaviila horova i heraho leilula, ehovea elaviila ovokake Aualari ikikelavalula. Are va haela oaria ve lei makukuriki Aualari, o iele havahu iki kelavalula la haela kara.

Timothy havahu ve ovokake i kileaki okiharo

¹¹ A ma oharo o iele pupu hovea kileavahaeaila.

¹² Haela aro haure lei v'arekaea ehovea a va haela āre. Ava ikikelavalula haela oropa ve ihova veveke leiki: oharo veveke i mai veveke ila, ikihuru i ikikekela i iki veveroro ila mea oaria kiva leiki.

¹³ Aiai ara ave leia elauki hoa, a oharo veveke mureakive kiva leiki, iroro veveke arive, kileaki mai veveke leiki.

¹⁴ Iki ureve meru veveke aro mai paeape la hoa a koarape. La meru kiva auhohi leiki: aro mai koharape hoa avape meru la.

¹⁵ Ma eharu ikikekelaila, iki auhohi kekelaila: laria ave oki veveke haela oaria ore leivahaeakilai.

¹⁶ A elare mai havahu kiva leiki, ave kileaki oharo kara. Maria la leikilava, ai haela oaria ila ovokake iele leivahaeakilai.