1 Timothy 3 - Pupu Oharo Āre 1963 Genese 1970 Rute 1972

Ekalesia ve oropa haela

¹ Ma oharo va iele: Haela ae va bishop horova ikivere la leikilava, la va horova veveke iele.

² Laelave bishop mai ehoe havahu kiva leiki; uva haroapo hiki laeakive, iki here mai, mai veveke hiki, mai ehoe iele, ikiheroe mai oaria, kilea horova kara, hovea hovea leikive;

³ Ma heaha larive haela ka, hahari v'arekaea, haela ka koalue, ikihuru leivila haela, hihiri va ka, erohoho ikivere haela v'arekaea.

⁴ Are elare lalava haela kiva auhohi leiki, areve akoremari kara ereve oharo mea oaria iapai leivahaeakive, heroe.

⁵ (Ehovea haela elare uvi haela kiva leikive haveva la leikilava, are Aualari ve ekalesia kiva learia leikilai?)

⁶ Are haela āre v'arekaea, are pelaea lei diabolo ve kurupaeaki oharo elavelave iapaki ave.

⁷ Aeka ma — mahokaea ve haela arero haela veveke kekelakive, heroe, areva rare heaha avaki ave, kai diabolo laria arero amuraeaki ave.

⁸ Diakono kara laria, iki ehohoe leivahaeakive, ape orahokaila v'arekaea, moni oaria kara ikivere kalaivahaelue.

⁹ Ere va Aualari ve ikikekela kara kiva ehoe lei iki veveroro leivahaeakive.

¹⁰ Erero au heheavakive heroe, ere va ehohoe la leivahaeakilava, ere va diakono horova iele havahu leivahaeakive va heroe.

¹¹ Ereve uavila kara iki ehohoe leivahaeakive heroe; ere va opopoe oharo kahukavalue, ere va horova i mai ehoe ila kiva leivahaeakive.

¹² Diakono va uva haroapo hiki, heroe. Ere va elare akoremari i lalava haela oaria ila kiva auhohi leivahaeakive.

¹³ Ehovea diakono horova i mai veveke ila kiva auhohi leilula la haela ere va rare veveke avakilai. Aeva ere Iesu Keriso ve ikikekela aheke leivahaeakilai.

¹⁴ Arave ma oharo uku mave haeaive — ara va ikivere haiapo ka ave leia elaukive.

¹⁵ Aka, ara perehekai haiapo la leikilava, a va ore oropa leikilai, Aualari ve uvi ureve mai ehoe kiva leikive. Ehovea la uvi va ovokake Aualari ve ekalesia, o iele ve ipi i aheke ila va la.

¹⁶ Ela va ma oharo ve iele ve hahari e va ka. Hehe mai ve iele Aualari aivau v'ila hihika leipe. Are va ove v'ila lei ehoe aneru arero eavape. Meahaiapo ve ita oaria iroro ape, kai akea ve la haharika pekape.