1 Timothy 1 - Pupu Oharo Āre 1963 Genese 1970 Rute 1972

Ikiheroe oharo: Kilea oharo haeae kiva leiki

¹ Ara, Paul, Iesu Keriso ve Aposetolo haela, elaviilave ovokake leivila Aualari ve ikivere, aeva elaviilave ikikekela Iesu Keriso.

² Timothy e, arave ikikekela akore iele, ara ave ma hohoa paraeaive Oa Aualari i Amua Iesu Keriso ve ikiheroe meru i ikihuru i havila ila avaki.

³ Ara Macedonia elaupe la hoa ara aro Ephesus aeakive maeape, ehovea a va haela uku aihukamaeakive, ere oharo lahua kilea v'arekaea.

⁴ Aeva ere lou‐oharo oaria i vilakao lahua lahua oaria kekela v'arekaea; ehovea la eharu ve haela iki horahora hiki leilula, kai Aualari ve ovokake leiki mai mekari kelava va ka. A va laria leiki.

⁵ Aka arave ahilaki oharo iele ma: iki ureve veveroro, ikiheroe iele, iki ehoe, iki kekela aheke, opore karia.

⁶ Uku haela la eharu mekaka haitapape, kai naoae oharo hukavaki mai ikivere leivahaeape.

⁷ Ere va ikivere pupu oharo kileakive, aka ere pupu iele i elare oharo ila ve iele haveva.

⁸ Elaviila ore, haela pupu kiva auhohi la leikilava, la pupu va veveke.

⁹ Elaviila ore kara, pupu va mai ehoe haela v'ila au karikila, aka ehovea pupu haure leilula haela kai mai haeae i heaha ila leilula la haela; iki heaha i o heaha arula haela, oa i lou ila ve haeaki haela, haela haealula haela;

¹⁰ Ehovea korea haela, airi pavora mai leilula haela, haela au hahaki haela, opore haela, kilea oharo ehoe ve haerapaki mai lahua lahua oaria kara;

¹¹ Aualari mekakure ve iroro oharo veveke araro avikiarape la kilea oharo veveke.

Paul ve thank you oharo ehovea Aualari ve ikihuru

¹² Ara va elaviilave Amua Iesu Keriso thank you avila, ehovea are araro aheke avikiarape, kai araro hovea hovea kekelape, ehovea areve horova leikive.

¹³ Ara va oropa hoa haela heaha, ara va haela heaha iele hararuape; lae vi va, are araro ikihuru leipe, ehovea la va arave haveva i iki kekelaki aue hoa.

¹⁴ Aeva areve ikiheroe meru eapapo iele are araro avikiarape, kai Iesu Keriso ve ikikekela i ikiheroe arave ureve leipe.

¹⁵ Ma va oharo veveke iele; haela oaria iki auhohi kelavaki: Keriso Iesu meahaiapo kihoaupe ehovea mai heaha haela lei makukurikive: ara kara mai heaha haela iele.

¹⁶ Aka are araro ma ikihuru leipe iele ehovea arave ureve Iesu Keriso areve kakare oaria hihika amoeakive, ihova hovea, laelave aireaki ikikelavaki haela oaria ovokake haiapo aeakilai.

¹⁷ Ehoveala, mea oaria aeavila la Amua, heaha leiki aue kai hihika aue la Aualari iele, lei morapaeaki aiai karia lei va ka. Amene.

¹⁸ Ara aro maria ahilaki, Timothy, arave akore e, ehovea a v'ila oropa peroveta hovea avahaeape la oharo v'ila, a mare veveke arive, heroe.

¹⁹ Iki aheke kekelaki, iki ehoe leiki. Uku haela la iki ehoe haure leivahaeai ikikekela haeae leivahaeape.

²⁰ Hymenaeus i Alexander ila laria. Ara erero Satan aiarape, ehovea ere oharo haeae hakurepakive ore leivahaeakive.