1 Peter 5 - Pupu Oharo Āre 1963 Genese 1970 Rute 1972

Oropa haela lei aheke leiki oharo

¹ Ara havahu va oropa haela, laelave ara va eve oropa haela oharo aheke kirive. Ara Keriso ve kakare hoa ovohae eavape. Ara va aireaki la mekakure hoa herehere leikilai.

² E va mamoe kiva haela, eve mamoe kiva auhohi leivahaeaki; e va la horova pupu ve hiki kekela va ka, aka la horova ikivere havahu leivahaeaki; kavale ikivere kalailue, aka la horova ikiheroe v'ila leivahaeaki.

³ E va Aualari ve mamoe amua hovea hiki kiva leivahaea v'areakaea; aka erero Aualari ve ihova hovea leivahaeaki.

⁴ Mamoe Kiva Haela Iele ekeki la hoa, e va karia leiki aue la mekakure iele koarakilai.

⁵ Hoveahovea, e haela āre eve oropa haela ve oharo iapai kiva leivahaeaki, kai pelaea mai kalaivahaelue: ehovea Aualari pelaea haela hereavakilai, aka maeoka haela are ikiheroe meru avarakilai.

Haela oaria ve hakakaeaki oharo

⁶ Laelave, e va Aualari ve aheke ve oropa ve maeoka leivahaeaki: Are va aireaki hoa ero lei morapaeakilai.

⁷ Eve heraho oaria arero avaraki. Are ero kiva mea oaria leivahaevila.

⁸ Mai ehoe leivahaeaki; kiva auhohi leivahaeaki, ehovea eve iri haela, la va haelaharihu iele, are va lion aeha iele hovea; are ikivere haela iele haeakive.

⁹ Eve ikikekela aheke lei haelaharihu hahari arive. E v'ore — eve la heraho meahaiapo ita oaria apavara oaria hoveahovea koarailula.

¹⁰ Eva oropa hoa kakare leikilai; aireaki meru oaria aiaravila la Aualari, elaviilara Iesu Keriso ve basileia mekakure ve itavavahaeape la Aualari, ero lei mekaka leivahaeakilai: are ero lei aheke leivahaeakilai — e va auhohi apeakilai.

¹¹ Areve rare mea oaria lei morapaeaki aiai karia lei va ka. Amen.

¹² Arava ma hohoa perehekai haeaive ero lei aheke leivahaeakive. Ara Silvanus, mai ehoe haela veveke, ma hohoa v'ila eve leia avaukilai. Ara va ikivere e Aualari ve ikiheroe meru iele ore leivahaeakive. E va la ikiheroe meru v'ila aheke apeaki.

¹³ Babylonia la ekalesia, eve apoheari hoveahovea, ero ikiheroe oharo paraeaive. Arave akore Mark, kara, laria.

¹⁴ E va elarelare ikiheheroe v'ila ape popoakive. E va Iesu Keriso ve haela oaria havila ila apeakive.