1 Peter 3 - Pupu Oharo Āre 1963 Genese 1970 Rute 1972

Vilaita i uavila ila

¹ Hoveahovea, e uavila eve vilaita kiva auhohi leivahaeaki. O iele uku vilahoaha oharo au iapaila, aka ere va ereve uavila ve mai veveke v'ila iki helarivahaeakive, oharo hiki iapa ka.

² Ehovea ere eve hehe mai mekakure ovohae eavavahaeakilai,

³ Eve maupa larive mai, maea ve la maupa eharu lahua lahua oaria v'arekaea; auri i pura maupa lahua lahua oaria v'arekaea.

⁴ Aka e va iki ure havahu, poae leiki aue la maupa mekakure avaki, iki here ove veveke avaki, la va Aualari oropa ve kavale eapapo eharu hovea.

⁵ Ehovea overa hoa hehe uavila maria leivahaeape — ere Aualari ikikelavape, iki ureve mekakure leivahaeai vilahoaha ve oharo iapai kiva leivahaeroape.

⁶ Hoveahovea, Sarah Abraham ve oharo iapai arero Amua rare itavape: E va mai veveke la leivahaeakilava, kai ikihorahora leikiaue la leivahaeakilava, e va areve meavohula iele.

⁷ Vilahoaha kara laria — e va uva ila auhohi apeakive, ehovea ere va maea mahuka, e va aheke, e va hoa haroapo ovokake meru haruku aeaki haela, eve ivaiva mai heaha leiki ave.

Keriso ve haela ve ikihuru mai

⁸ Hita oharo ma: E oaria ikikekela haroapo hovea leivahaeaki; elarelare ikihuru leivahaeaki, apavara mai kiva auhohi leivahaeaki, ikiheroe lei ape oharo harita harita avahaeaki.

⁹ Heaha ve kavale heaha kavararue; hihiri ve kavale hihiri kalailue; aka oharo veveke hukavaki — ehovea e v'ore, e v'aireaki veveke koarakilai, ero itavavahaeape iele va la.

¹⁰ Ehovea ovokake ikivere la haela, Veveke aeakive ikivere la haela, Veveke are ape kiva lei oharo haeae hukava v'arekaea Kai opore oharo kailue.

¹¹ Are mai haeae kalailue, mai veveke hiki leikive, Are va havila ikivere lei kiva leikive.

¹² Ehovea Amua mai ehohoe haela oaria ovohae eavavahaevila, Are mea oaria ereve velavela oharo iapavahaevila: Aka mai hahaeae ila la haela Amua ikihairihairi eapapo leivila.

Ero haeae leiki haela hihiri v'arekaea. Keriso ve mai iki kelavaki

¹³ E va mai veveke hiki ikivere la leivahaeakilava, ero heaha leita leikilai ha?

¹⁴ E va mai ehoe v'ila kakare la koaravahaeakilava, ikiveveke leivahaeaki. Ero heaha leikive ikivere la haela oaoka kalaivahaelue.

¹⁵ Aka eve iki ureve Aualari ve rare iele morapaeaki: Haela eve ikikekela ve iele v'ila apevelavela leiki hoa, erero kavale oharo maeaeaki, horahora kalaivahaelue; maeoka i harita harita ila oharo kavale maeaeaki.

¹⁶ Eve iki ehoe leivahaeaki; ere eve rare lei heaha la leikilava, mai hahaeae haela hoveahovea, ere makiri leivahaeakilai, ehovea eve mai oaria veveke hiki; Keriso ve hoveahovea.

¹⁷ Aualari ikivere la leikilava, veveke maria e va heraho koarakive, ehovea mai haeae va ka, aka ehovea mai veveke ve.

¹⁸ Ehovea Keriso hoa haroapo mai heaha v'ila kakare koarape — are va mai ehoe haela, ehovea mai haeae haela. Are va ikivere elaviilara Aualari ve ukaki kari aukive. Are aivau hoa ve apape, aka Ove Veveke v'ila ovokake leipe.

¹⁹ Areva Ove Veveke v'ila uvi muru ureve apearoape la Ove uku ve iroro ape.

²⁰ La va iapaki aue haela uku, Noah ve hoa, Aualari ikihuru haiapo iele leipe la hoa; Noah vevaea hahape hoa, haela haroapo haroapo, 8 ila, ma ve la okiharo ovokake leivahaeape.

²¹ Hoveahovea, ma hoa, elaviila bapatiso mai v'ila ovokake leivahaeakilai, o iele, maea ve hirihiri huhelaki mai hiki ka, aka Aualari oropa ve iki veveroro leikive, Iesu Keriso api kai uroupe la okiharo ve.

²² Are kaia ve pekape; Are Aualari ve mai ore ukai ve haiavavila. Areve oharo aneru i kaia ve la amua oaria iapailula.