1 Peter 2 - Pupu Oharo Āre 1963 Genese 1970 Rute 1972

¹ Laelave, ikiheaha i hehepo ila, opore i ikihairihairi ila, kai o heaha la mai oaria hahaure havahu leivahaeaki.

² Elaviila āre erape akoremari titaeka hovea — Oharo Veveke ve amae apu hovea ikivere leivahaeaki; e va Ove v'ila aheai aheke leivahaeakive.

³ E va ore overa leivahaeape, Amua ve la eapai va veveke iele.

⁴ E va arero kai ekevahaeaki — are va have ovokake ita hoveahovea; o iele haela uku arero haure leivahaeape, aka Aualari arero ikivere havahu leipe, kavale eapapo eharu hovea hovea.

⁵ E kara va have ovokake, ove uvi hovea kupe. E va hehe iele, ehovea arura horova iele leikive; Iesu Keriso ve okiharo ve Aualari ero ikivere leivahaevila.

⁶ Hehe Buka kara oharo laria hape: Eavaila: Ara Sion leia uvi ve have ive le urapave, Mekakure, aheke iele. Areve rare ikikekela la haela ikihorahora lei va ka.

⁷ E va ikikelavalula haela, laelave are e v'ila mekakure iele; aka iapaki aue v'ila la haela: Uvi have haure leipe la uvi horova haela, La have va uvi ive iele.

⁸ Are va ere v'ila lei hihilauki have, Heraho leivila have: Ehovea oharo iele va erero au hereavalula, ehovea ere roaiarape la oharo ere va au iapaila.

⁹ Aka e va Aualari ve ikivere leipe vilakao, amua ve oharo haela, hehe hiru iele, au itavape vila‐ipi, ehovea ero muru hoa ve aiai ovava hoa mekakure iele itavape la Amua ve morapaeaki oharo arive.

¹⁰ E va oropa hoa vilai‐ipi iele ka, aka ma hoa e va Aualari ve vila‐ipi havahu; e va areve ikihuru oropa au availa — ma hoa e ka le avi.

¹¹ Apavara iele, ara ero ape karava maeaeaive — e va ita lahua haela i hahi haela hovea meahaiapo ve la mai heaha hahaure leivahaeaki, ehovea la eharu va Ove ve heaha leivahaeaki eharu.

¹² E va ita lahua haela oropa ve oharo ehoe hiki hukavaki. Ere va eve rare heaha arula, mai heaha haela hovea, aka ere eve horova mekaka oaria ovohae la eavakilava, eve heheavaki hoa ere Aualari morapaeakilai.

Meahaiapo amua haela ve pupu kiva leivahaeaki

¹³ Meahaiapo ve la pupu mekaka kiva leivahaeaki, ehovea Amua ve harihari. Meahaiapo amua ve la pupu la,

¹⁴ gavana haela ve kara, ehovea amua kipaparaehape pupu haela, ehovea mai heaha heheavakive. Veveke leivahaeaki haela kai kiva leivahaeakive.

¹⁵ Ehovea Aualari va ikivere maria, e va horova veveke la leivahaeakilava — e va oharo haeae maeaelula la haela ve ape kokaukakilai.

¹⁶ E va ovokake haela hoveahovea apeaki, eve la ovokake v'ila mai heaha kalaivahaelue, aka Aualari ve horova haela hovea hovea leivahaeaki.

¹⁷ Haela oaria momorapuki, apavara ikiheheroe leivahaeaki, Aualari hehe rare kelavaki, meahaiapo amua eapapo morapaeaki.

Horova auhohi leivahaeaki mai

¹⁸ Horova haela eve haelapo ve oharo auhohi iapai leivahaeaki, oaoka hovea, ape harita harita arula la haela, kai ape hihiri arula la haelapo, hoveahovea;

¹⁹ Ehovea mai veveke iele maria, Aualari ve harihari v'ila heraho i kakare ila la hoa auhohi apeakive.

²⁰ Learia veveke ha? Haeae ve la kakare kavale koaraki hoa, ikiheaha lei va ka ha, aka haeae karia leiki aue la hoa, e va heraho la koarakilava, hihiri leivahaea va ka ha? Laria hiki e va Aualari ve ikivere mai leivahaelula.

²¹ Ero itavavahaeape iele ma — Keriso elaviila ve kakare koarape; are elaviilave ihova leipe, ehovea elaviila areve la mai hoveahovea leivahaeakive.

²² Are mai haeae au leila, areve ape ve oharo heaha au horeavaila.

²³ Haela arero o heaha maeape la hoa, are kavale o heaha au kimaeaila. Are kakare koarape la hoa are hihiri au leila; are ehoe heheavila la Oa iki kekelape.

²⁴ Are elare maea ve elaviila ve mai heaha ve kavale avape, satauro akea ve, ehovea elaviila mai heaha v'ila apihaeape haela hovea, mai ehoe v'ila ovokake apeakilai. Areve la kakare eapapo ero lei makukuripe.

²⁵ Ehovea e va au titavape mamoe hoveahovea, aka ma hoa e va eve Mamoe Kiva Haela, (Ove iele kiva haela) ve ukaki helari le ekevahaeape.