1 Peter 1 - Pupu Oharo Āre 1963 Genese 1970 Rute 1972

Ikiheroe oharo

¹ Ara, Peter, Iesu Keriso ve aposetolo haela — Pontus kai Galatia kai Cappadocia kai Asia kai Bithynia apealula Keriso ve haela oaria ve hohoa maria haeaive.

² Oa Aualari ero ikivere overa leivahaeape Ove Veveke ve okiharo v'ila. Iesu Keriso ve horova i apu ve bapatiso mai ila avakive. E ikiheroe meru i havila ila apeakive.

Thank you oharo ehovea Keriso ve ovokake okiharo

³ Elaviilave Amua Iesu Keriso ve Oa Aualari lei morapaeaki. Ehovea Are elaviilara ikiheheroe eapapo leivahaeape, laelave elaviila Iesu Keriso ve api kai uroupe hoa v'ila āre erape, kai ovokake iele koarape.

⁴ Elaviilave haruku va mekakure iele, are heaha lei va ka; ehovea are va Kaia Akea ve eharu iele.

⁵ Elaviilave ovokake iele leivahaeakilai, ehovea elaviilave ikikekela aheke iele aiai meahaiapo karia leiki hoa.

⁶ Laelave e va ma hoa heraho koarailula, ehovea amuraeharae hoa ma, aka aireaki hoa e kai ikiveveke leivahaeakilai.

⁷ Ehovea eve ikikekela ve heheavaki hoa va mekakure iele, heaha leiki la gold ve mekakure perehekai, a ve heheavape la gold kara perehekai veveke hiki. Iesu Keriso ve kihoreraki hoa eve la ikikekela ve mekakure hihika eavakilai.

⁸ E va arero ore au laila, aka e va arero ikivere leiro. O iele, e va arero ma hoa eava va ka, aka e va areve rare iki kelavalula, laelave e va ikiveveke eapapo ila areve rare morapaeakilai.

⁹ O iele, eve ikikekela ve kavale e v'aeakilai, eve ove ve ovokake la.

¹⁰ La ovokake Peroveta haela auhohi haropi kai velavela leivahaeape. Ere eve ma ikiheroe meru ve peroveta oharo avahaeape.

¹¹ Ere va haropape iele ma — ereve ureve la Keriso ve Ove learia, kai lela hoa kihorerakilai; ehovea la Ove oropa hoa Keriso ve aireaki kakare oaria vavavape, kai areve aireaki haharika mekakure.

¹² Ere va ore leivahaeape ma eharu, ehovea ere havahu va ka, aka ehovea elaviila ve. Ma eharu iroro haela ero kai ma hoa kilealula, ehovea ere kara kaia ve kiparaeape la Ove Veveke avi iroro avahaeape. O iele, aneru kara ma eharu ovohae eavakive ikivere.

Keriso ve haela ve mai veveke

¹³ Laelave, eve ikikekela aheke leivahaeaki, iki ehohoe leivahaeaki, aireaki Iesu Keriso ve kihoreraki hoa ve la ikiheroe meru ikivere havahu leivahaeaki:

¹⁴ E va iapavahaeaki akoremari hovea leivahaeaki: overa leivahaeape la mai hovea kalaivahaelue.

¹⁵ Ero itavavahaeape haela va hehe ila, laelave e kara mai veveke i hehe ila kiva auhohi leivahaeaki.

¹⁶ Ehovea buka oharo maria hape, E va hehe mai kiva leivahaeaki, ehovea ara kara hehe ila.

¹⁷ E va Oa ve rare la itavakilava, ehovea are va haela oaria ehoe iele heheavavila, eve ma meahaiapo apeaki hoa iki oaoka hovea apeakive heroe.

¹⁸ Ehovea e v'ore meahaiapo poae leivahaeaki eharu, gold i silver ila hovea la eharu eve vilali ve avape la mai ve lei ovokake au leila.

¹⁹ Aka eve ovokake ve kavale leipe eharu va Keriso ve apu mekakure, ehovea are va mamoe Akore mekakure, heaha karia havahu iele.

²⁰ Areve rare meahaiapo avare koare hoa leipe, aka ma hoa eve ovokake hihika avarape.

²¹ Ehovea e va areve okiharo v'ila Aualari va rare ikikelavalula. Aualari arero apaki hoa ve lai urapape, kai areve rare morapaeape. Ehovea e va Aualari iele havahu iki kelavakilai.

²² E va O iele oharo iapavahaeape, laelave eve Ove lei veveroro leivahaeape — Ove Veveke ve la okiharo ve: ehovea e va elarelare apavara mai veveke ore le leivahaeape; laelave veveke maria: e elarelare ikiheheroe leivahaeakive, heroe.

²³ E va āre erape haela, meahaiapo v'ila au eraila, aka kaia ve erape haela, Aualari ve oharo v'ila. La oharo va ovokake aiai karia lei va ka.

²⁴ Ehovea: Aivau oaria va hohe hoveahovea; Haela ve mekakure va kora mere ve la pupuri hovea. Hohe va haroropakilai, pupuri apihaeakilai;

²⁵ Aka Amua ve oharo aiai karia lei va ka. Ma oharo iroro ve la okiharo v'ila ero kai kileavahaeape.