1 John 5 - Pupu Oharo Āre 1963 Genese 1970 Rute 1972

Keriso ve haela ve ikikekela

¹ Iesu va Keriso ikikekelavila la haela are va Aualari ve haela. Haela oaria au epape la haela ikivere la leikilava, arero epape la haela kara ikivere leive.

² Elaviila ore, elaviila Aualari ikivere leiki la hoa, kai areve pupu kiva leiki la hoa, elaviila Aualari ve akoremari kara ikivere leilula.

³ Ehovea Aualari ikiheroe leiki mai iele ma: Areve pupu kiva leivahaeakive. Areve pupu elaviila v'ila heraho va ka.

⁴ Ehovea Aualari ve epape la haela meahaiapo heaorapakilai. Meahaiapo ve heaorapaki eharu iele va elaviilave ikikekela iele.

⁵ Meahaiapo leita heaorapakilai ha? Iesu va Aualari ve Akore ikikekelavila la haela.

⁶ Ma i apu ila ve oki ve Iesu Keriso ekepe. Ma hiki va ka, aka ma i apu ila.

⁷ La oharo Ove vavavila, ehovea la Ove va o iele.

⁸ Meahaiapo ve vavavaki eharu va ilehoila — Ove, kai ma, kai apu ila. Ma eharu ilehoila ve oharo iele va haroapo.

⁹ Elaviila haela ve vavavaki oharo la iapakilava, Aualari ve vavavaki oharo akea ve, ehovea Aualari areve Akore v'ila o iele vavavape.

¹⁰ Aualari ve Akore ikikekelavila la haela, areve la vavavaki oharo elare iki ureve avape. Aualari ve oharo ikikekelaki aue la haela, are va arero opore hovea leipe, ehovea are Aualari akore v'ila maeape la oharo ikikekela va ka.

¹¹ O iele ma — Aualari elaviilara ovokake haiapo avikiarape. Ma ovokake areve akore ve ureve aeavila.

¹² Akore avaki la haela are ovokake kara avakilai; Aualari ve Akore avaki aue la haela are ovokake kara ava va ka.

Kokaukaki oharo

¹³ Ara va ma oharo e v'ila haeape, ehovea e va Aualari ve Akore ve Rare iki kelavalula haela. E v'ore leivahaeakilai — e va Ovokake Haiapo avakilai, kai Aualari ve Akore ve rare ikikelavakilai.

¹⁴ Elaviila are v'ila maria kelavalula: Elaviila arero eharu aeva apevelavela leivahaeakilai, areve ikivere hovea, are elaviilave oharo iapakilai.

¹⁵ Elaviila ore la leikilava, are elaviilave oharo iapakilai; elaviila ore elaviila velavela leivahaeaki la eharu are elaviilara aikiarakilai.

¹⁶ Haela ae elare apoheari ve haeae la eavakilava, la haeae heaha havahu ka, are are v'ila ovokake apevelavela leikilai; are kai ovokake avakilai, ehovea areve haeae heaha havahu ka. Mai haeae heaha havahu le apearo.

¹⁷ Mai haeae oaria va heaha, aka uku haeae heaha havahu iele va ka.

¹⁸ Elaviila ore Aualari v'ila epape haela mai haeae lei va ka: aka Aualari v'ila epape la haela, are elare mai kiva hiki leivila, laelave diabolo arero kurupaea va ka.

¹⁹ Elaviila ore elaviila Aualari ve haela: Meahaiapo oaria hareho va diabolo ve eharu.

²⁰ Elaviila ore Aualari ve Akore ekepe. Are elaviilara ikiore avikiarape, ehovea ore leikive. Are va o iele Aualari. Elaviila o iele la Aualari ve ureve apealula, o iele areve Akore Iesu Keriso. Ma va Aualari Iele, ovokake haiapo iele.

²¹ Akoremari e, e va harihu eharu opore hahaure leivahaeaki.