1 John 4 - Pupu Oharo Āre 1963 Genese 1970 Rute 1972

Aualari ve Ove avaki mai

¹ Apavara, ove oaria kakelavarue, aka ove heheavaki, ere va Aualari ve iele. Ehovea opore peroveta haela oaria meahaiapo kihoreavape.

² E va Aualari ve Ove ore maria leikilai — Iesu Keriso aivau ve ekepe vavavalula la ove va Aualari ve.

³ Aka Iesu Keriso aivau ve ekepe vavavaki aue la ove va Aualari ve karia. Ma va Keriso ve iri haela ve ove. E va areve ekeki oharo overa iapape — o iele are va meahaiapo aeavila.

⁴ E va Aualari ve eharu, akoremari e: Eva erero heaorapape; ehovea eve ureve aeavila la Aualari va aheke iele, meahaiapo aeavila la eharu va mahuka.

⁵ Ere va meahaiapo eharu, laelave ere va meahaiapo ve oharo hukavalula, meahaiapo ereve oharo iapailula.

⁶ Elaviila Aualari ve haela — Aualari ore la haela are va elaviilave oharo iapaivila: Aualari karia la haela, are elaviilave oharo iapa va ka, Elaviila maria o iele ve ove ore leivahaeakilai, kai opore ve ove kara.

Aualari ikivere mai kai haela ikivere mai

⁷ Apavara, elaviila elarelare ikiheheroe leivahaeaki, ehovea ikiheroe va Aualari ve. Ikiheroe leilula la haela va Aualari ve epape haela — are kara Aualari ore.

⁸ Ikiheroe leiki aue la haela — are va Aualari haveva, ehovea Aualari va ikiheroe.

⁹ Aualari ve ikiheroe elaviilave oropa ve hihika maria leipe — ehovea Aualari are hiki epape Akore meahaiapo kiparaeape, ehovea elaviila are v'ila ovokake iele leivahaeakilai.

¹⁰ Ikiheroe iele maria: Elaviila Aualari ikivere leivahaeape leia va ka, aka Are elaviilara ikiheheroe havahu leivahaeape: are areve Akore elaviilave mai heaha hapururukakive kiparaeape.

¹¹ Apavara e, ehovea Aualari elaviilara ikivere havahu leivahaeape, elaviila kara elarelare ikivere leivahaeakive.

¹² Haela ae Aualari au eavaila, karia iele. Elaviila elarelare ikiheheroe la leivahaeakilava, Aualari elaviilave ureve aeavila; areve ikiheroe elaviilave ureve mekakure leikilai.

¹³ Elaviila ore, elaviila areve ureve apealula, are kara elaviilave ureve aeavila, ehovea are areve Ove elaviilara aikiarape.

¹⁴ Elaviila eavape kai o iele vavavakilai, Oa Akore kiparaeape, ehovea meahaiapo haela oaria lei makukurikive.

¹⁵ Iesu va Aualari ve Akore vavavila la haela, Aualari areve ureve aeavila, are kara Aualari ve ureve aeavila.

¹⁶ Elaviila ore leipe kai ikikekelape — Aualari elaviilara ikiheheroe leivahaeape. Aualari va ikiheroe. Ikiheroe v'ila aeaki la haela, are Aualari ve ureve aeavila, Aualari kara areve ureve aeavila.

¹⁷ Elaviila ikiheroe mahovea mekakure leikilai; elaviila heheavaki hare oaoka leivahaea va ka, ehovea elaviila ma meahaiapo apeaki mai, areve mai hoveahovea.

¹⁸ Ikiheroe ve iele oaoka karia: Ikiheroe iele oaoka leiki mai avakakilai: ehovea haela ve oaoka iele kavale heaha avakive. Oaoka leiki la haela are va ikiheroe ve la mai ve mekakure au leila.

¹⁹ Elaviila arero ikivere leilula ehovea are oropa elaviilara ikivere leivahaeape.

²⁰ Haela maria la maeakilava, ara va Aualari ikivere leive, kai apoheari ikiheaha la leikilava, are opore haela: ehovea haela overa eavape la apoheari ikivere leiki aue la leikilava, are au eavaila la Aualari leari lei ikiheroe leikilai ha?

²¹ Elaviila are v'ila avape pupu ma: Aualari ikivere leiki la haela are elare apoheari kara ikivere leikive.