1 John 3 - Pupu Oharo Āre 1963 Genese 1970 Rute 1972

Oa ikivere haela mai veveke leivila

¹ Eavaila — Oa elaviilara ikiheroe eapapo leivahaeape, ehovea elaviila Aualari ve akoremari rare avape. Laelave, meahaiapo elaviilara ore va ka, ehovea are Aualari kara ore au leila.

² Apavara, elaviila ma hoa Aualari ve akoremari; elaviila aireaki learia leivahaeakilai la, ma hoa haela ore va ka, aka elaviila ore ma: areve kihoreraki hoa, elaviila arero hoveahovea leivahaeakilai, ehovea elaviila arero hihika eavakilai.

³ Ma oki ikivere haela oaria elare mai veveroro leivahaeaki va heroe, areve la veveroro hovea.

Aualari ve akoremari mai haeae hovea ka

⁴ Mai haeae leiki la haela, are pupu kara haerapaki haela, ehovea mai haeae va iele pupu haerapaki mai.

⁵ E v'ore are kihoaupe iele ehovea elaviila ve mai heaha hapururukakive; areve ureve haeae karia.

⁶ Areve ureve aeavila la haela mai heaha lei va ka. Mai heaha leivila la haela arero au eavaila, kai arero ore au leila.

⁷ Akoremari e, haela ero kamuraealue. Mai ehoe leivila la haela are va mai ehoe haela, areve la mai ehoe hovea hovea.

⁸ Mai heaha leivila la haela va diabolo ve haela, ehovea diabolo mai haeae leipe, avare koare hoa ikiki mahau. Ehovea ma Aualari ve Akore kihorerape, ehovea diabolo ve horova heaha hai ka leikive.

⁹ Aualari v'ila epape haela mai haeae lei va ka, ehovea areve iele areve ureve aeavila. Are mai haeae leikive hovea ka, ehovea are Aualari v'ila epape akore.

¹⁰ Mahovea Aualari ve akoremari hihika leilula, diabolo ve akoremari kara. Mai ehoe leivahaeaki aue haela va Aualari ve akore va ka. Apoheari ikiheroe leiki aue la haela kara.

¹¹ Ehovea ma va oropa hoa iapape oharo ma: Elaviila elarelare ikiheheroe leivahaeaki.

¹² Cain leipe la mai hovea v'arekaea, ehovea are va diabolo ve haela, are elare apoheari huru hape. Are arero hape ehovealeve ha? Ehovea are va mai heaha haela, aka areve apoheari va mai ehoe.

Apavara elarelare ikiheroe leiki mai

¹³ Meahaiapo ero ikiheaha la leikilava, apavara, ikihorahora kalaivahaelue.

¹⁴ Elaviila ore elaviila apaki hoa hakurepai ovokake le avape, ehovea elaviila apavara ikiheheroe leivahaelula. Elare apoheari ikiheaha leiki la haela are va apaki hoa hovea aeavila.

¹⁵ Elare apoheari ikiheaha leivila la haela are va haela harive haela hoveahovea. E v'ore haela harive la haela ovokake haiapo ava va ka.

¹⁶ Elaviila Aualari ve ikiheroe maria eavalula: ehovea Are elare ovokake elaviila v'ila avarape. Laelave elaviila kara apavara v'ila ovokake avarakive, heroe.

¹⁷ Aka, ma meahaiapo ve eharu oaria ila la haela areve apoheari ve heraho la eavakilava, kai arero ikihuru lei koara va ka, Aualari ve ikiheroe areve ureve aeavila ha?

¹⁸ Akoremari e, elaviilave ikiheroe va oharo hiki v'arekaea, ape iilu hiki kailue, horova i o iele ila heroe.

¹⁹ Elaviila maria ore leivahaeakilai, elaviila o iele haela, elaviila maria iki ehoe iele leivahaeakilai.

²⁰ Elaviilave iki haeae la kelavakilava, Aualari va eapapo, elaviilave iki hekai, Aualari eharu oaria ore hiki.

²¹ Apavara, elaviilave iki elaviilara hahaki aue la leikilava, elaviila Aualari iki iele kelavalula.

²² Elaviila arero velavela leivahaeaki la eharu aeakilai, ehovea elaviila areve pupu kiva leilula kai areve ikivere horova leilula.

²³ Areve pupu iele ma — elaviila areve akore Iesu Keriso ve rare iki kelavakive, kai elarelare ikiheheroe leivahaeakive, Are elaviilara avikiarape la pupu hoveahovea.

²⁴ Areve pupu kiva leivahaevila la haela areve ureve aeavila: Are kara areve ureve aeavila. Mahovea elaviila ore, are elaviilave ureve aeavila, ehovea are elaro Ove Veveke avikiarape.