1 John 2 - Pupu Oharo Āre 1963 Genese 1970 Rute 1972

¹ Arave akoremari titaeka e, ara ma hohoa ero paparaehaive — e mai heaha kalaivahaelue. Haela ae mai haeae la leikilava, elaviilave Oa ve oropa ve hukapaki haela le aeave, mai ehoe iele Iesu Keriso.

² Are va elaviilave mai heaha ve kavale leivila haela: Elaviilave mai heaha hiki ka, aka meahaiapo haela oaria ve.

Iapai kelavaki mai — Aualari i hareho veaki mai la

³ Elaviila areve pupu kiva la leivahaeakilava, elaviila arero ore iele ve ihova la.

⁴ Haela ae la maeakilava, Ara Arero ore, aka areve pupu kiva leivahaeaki aue la leikilava, are va opore iele, areve ureve o iele karia.

⁵ Aka areve oharo iapaivila la haela, areve ureve Aualari ve ikiheroe mekakure leivila; laria elaviila ore leivahaeakilai, elaviila areve ureve apealula.

⁶ Haela ae la maeakilava, Ara areve ureve aeavila, la haela va areve mai oaria hoveahovea leikive, heroe.

⁷ Apavara, ara ero pupu āre avara va ka, aka overa pupu ma: e avare koare hoa avape pupu: La overa pupu iele va e oropa hoa iapape la oharo.

⁸ Oharo aeva ma: Ara ero pupu āre hovea avarakive — ma oharo areve ureve va iele, eve ureve kara, ehovea muru hoa karia leipe. Ma hoa ovava iele heauapavila.

⁹ Haela ae ovava ureve aeavila oharo la maeakilava, kai apoheari ikiheaha la leikilava, are va muru hoa iele aeavila ikiki mahau.

¹⁰ Elare apoheari ikiheroe leivila la haela ovava ureve aeavila, areve hilauki hoa karia.

¹¹ Areve apoheari iki heaha leivila la haela va muru hoa aeavila, areva muru hoa hiki veavila, are elare oki haveva, ehovea areve ovohae muru iele leipe, ovohae kariri hovea.

¹² Akoremari titaeka e, ara eve hohoa harive iele ma: eve mai heaha hapururukape ehovea areve harihari.

¹³ Oalou haela e, ara eve hohoa harive iele ma: E va arero ore leivahaeape, overa hoa ikiki ma hoa. Harokou oaria e, ara eve hohoa harive iele ma: e va diabolo heaorapape. Akoremari e, ara eve hohoa harive iele ma: ehovea e va Oa ore leivahaeape.

¹⁴ Oalou haela e, ara eve hohoa haeape — ehovea e va avare koare aeaveape la Oa ore leivahaeape. Harokou haela e, ara eve hohoa haeape ehovea e va aheke Aualari ve oharo eve ureve aeavila, e va diabolo heaorapape.

¹⁵ Meahaiapo ikivere kalailue: meahaiapo eharu oaria kara ikivere kalaivahaelue. Haela meahaiapo ikivere la leikilava, Oa ve ikiheroe areve ureve aea va ka.

¹⁶ Ehovea meahaiapo ureve la eharu oaria, aivau ve ikivere mai oaria, ovohae ve heaha, meahaiapo ovokake pelaea mai, ere va Oa ve eharu ka, ere va meahaiapo eharu hiki.

¹⁷ Meahaiapo karia leikilai, areve heaha oaria kara: aka Aualari ve ikivere mai leivila haela, are va ovokake haiapo avakilai.

Keriso ve Iri haela kiva leivahaeaki

¹⁸ Akoremari titaeka e, meahaiapo ve hita hoa ma. Eva overa iapape, Keriso ve iri haela ekekilai. Ma hoa Keriso ve iri haela oaria, laelave e v'ore mea aeaki hoa maea iele.

¹⁹ Ere elaviilara haitapape, aka ere elaviilave haela havahu ka. Ere va elaviilave haela hovea la leivahaeakilava, ere elaviila ila hareho apeakilai. Aka ere elaviilara haitapape, ehovea elaviilara hihika amoeakive ere elaviilave haela ka.

²⁰ Hehe haela ero bapatiso leivahaeape, laelave e va eharu oaria ore leivahaeape.

²¹ Ara ero ma oharo au paraeaila ehovea e o iele haveva, aka ehovea e va o iele ore leivahaeape: opore oharo o iele ila hoa haroapo apea va ka.

²² Opore haela leita ha? Iesu va Keriso aue maeaki la haela. Keriso ve iri haela leita ha? Oa i Akore ila kelavaki aue la haela.

²³ Akore kekelaki aue la haela — are kara Oa iele ava va ka. Akore kekelaki la haela are Oa kara avakilai.

²⁴ E avare koare hoa iapape la oharo eve ureve kiva leivahaeaki. E va overa iapape la oharo eve ureve la aeakilava, e kara Akore i Oa ila ve ureve aeakilai.

²⁵ Are elaviilave okoare ape ma: ovokake haiapo aeakive.

²⁶ Ara eve ma hohoa kai harive iele ehovea ero amuraeaki haela oaria.

²⁷ Aka are ero bapatiso leivahaeape la mai eve ureve aeavila. Haela ae ero leve kileavahaeakive? Aka ero bapatiso leivahaeape la mai ero eharu oaria kileavahaevila, are va o iele, opore karia.

²⁸ Akoremari titaeka e, e va areve ureve apeaki. Laelave areve kihoreraki hoa elaviila ikihorahora leivahaea va ka. Ela va areve oropa ve makiri leivahaea va arekaea.

²⁹ Areve mai ehoe iele e v'ore la leivahaeakilava, e v'ore leivahaeakilai, mai ehoe kiva leivahaelula haela oaria are v'ila erape.