1 Corinth 9 - Pupu Oharo Āre 1963 Genese 1970 Rute 1972

Paul ve mai, elare pelaea lei va ka

¹ Ara aposetolo haela ka ha? Ara va ovokake haela ka ha? Ara Iesu Keriso au eavaila ha? E va ara Amua v'ila leivahaeape horova eharu ka ha?

² Ara haela ae ve apostle haela leiki aue la leikilava, o iele ara eve aposetolo haela. E va Amua v'ila arave aposetolo horova ve iele.

³ Araro heheavalula haela oaria ara kavale oharo mari maeaeaive:

⁴ Ela eapai i ma ila larive hovea va ka ha?

⁵ Ela va mariloa, aka uva, lai aukive, Apostle haela uku i Amua ve apoheari i Cephas ila leilula lahovea, pupu ila ha?

⁶ Ara i Barnabas ila, elalila hiki elare maea ve horova hoa haerapa v'arekaea ha?

⁷ Mare horova haela elare horova eharu ilaea leivila ha? Oru horova leivila la haela, are la oru ve eapai le va ka ha? Boromakau kiva leivila la haela amae apu le va ka ha?

⁸ Ara ma oharo haela hovea hiki maeaive ha, aka pupu kara laria huape ha?

⁹ Ehovea Moses ve pupu maria hape; A va wheat hae huharavila la boromakau ve ape au huka?-?havukalue! Aualari boromakau hiki kiva leivahaevila ha?

¹⁰ Aka, Are elaviila v'ila la maeape ha? O iele, elaviila v'ila ma oharo hape: Ehovea kekela ihaki la haela aireaki eapai kekelakilai: aeva hae ikaeaki la haela kara, areve ikivere eapai herehere leikilai.

¹¹ Ela va eve ove ve veveke la hae apoporaupe, laelave, ela va eve meahaiapo ve eharu herehere larilai! La va heaha ha?

¹² Haela ae maria va laila, ela ka leivahaeaki hovea ka ha? Ela ma horova au laila. Ela va kakare eapapo leikive ikihairihairi au leila, Keriso ve iroro horova heaha leiki ave.

¹³ E va haveva ha? Hehe eharu kiva leivahaelula la haela, ere va Hehe Uvi eharu laralula. Arura haha kiva leivahaelula la haela ere arura haha eharu herehere laralula.

¹⁴ La kara, Amua kai maria ahilape, Iroro oharo arura haela ere va iroro oharo ve ovokake avakilai.

¹⁵ Aka ara maria au laila, aeva ara ma oharo au haila, ehovea e va araro mahovea leikilai: ara va apakilai heroe, haela arave horova naoae leiki ave.

¹⁶ Ehovea ara va iroro arive haela, aka ara elare pelaea leiki eharu karia: ehovea araro avikiarape horova la — o iele ara iroro oharo ari aue la leikilava, ara va haeae leikilai.

¹⁷ Ara va ikivere lei ma horova leikilai, ara meru veveke koarakilai: aka ara va horova haela hovea hiki la leikilava, araro maeape horova hiki ara leivila.

¹⁸ Ehovea arave kavale iele le ha? Mahovea la, ara iroro oharo arive la hoa, ara va kavale eharu kekela va ka: Laria ara iroro arive haela ve la mekakure havoava va ka.

Are ikivere haela oaria Keriso ve kari aukive

¹⁹ Ehovea ara haela oaria ve horova ve hahape haela karia, aka ara va haela oaria ve horova leivila, ehovea ara laria veveke koarakilai.

²⁰ Ara Jew haela i veavila, ara ka Jew haela hovea le leive, ehovea Jew haela karakive. Ara ka pupu haela i hareho la veakilava, ara ka pupu haela hovea le leive, ehovea pupu kiva leilula haela karakive.

²¹ Ara pupu mahokaea ve la haela i hareho la veakilava, ara va pupu mahokaea ve le leikilai: (Ara Aualari ve pupu mahokaea ve va ka, aka Keriso ve pupu ureve), ehovea pupu mahokaea ve la haela karakive.

²² Ara va mahuka haela i hareho la veakilava, ara ereve la mahuka hovea le leive, ehovea mahuka haela karakive.

²³ Ara va ma horova oaria leivahaevila ehovea iroro oharo ve harihari, ara la eharu veveke e i hareho herehere avakilai.

Harava aheke haela meru avakilai

²⁴ Harava hivove arura la haela oaria harava aheke hukaulula, aka haela haroapo hiki oropa ve la meru avakilai. E harava aheke vivilaki, meru iele aeakive.

²⁵ Maea ve erau haela oaria elare maea kiva auhohi leilula. Ere va la horova ehovea karia leiki la meru avakive. Aka elaviila ve meru karia lei va ka.

²⁶ Ara va harava aheke i ehoe iele vivilave, arave hahari aheke kara, ara mea naoae koa va ka.

²⁷ Aka, ara maea ve eharu mea oaria hahavila, ehovea ara haela ae la kileakilava, ara havahu la mai veveke lei va ka.