1 Corinth 8 - Pupu Oharo Āre 1963 Genese 1970 Rute 1972

Meahaiapo haela ve maea morava leiki mai

¹ Aeva eravo ve hohao‐harihu ipi ve aipevahaeape la eapai oharo ma: Elaviila oaria hareho va ikiore haela. Haela ikiore mai ve pelaea leilula; ere va ikiheroe mai v'ila iki ehohoe leilula.

² Haela ae va areve ikiore eapapo la kekelakilava, areve ikiore iele karia.

³ Aka haela ae Aualari ikivere la leikilava, Aualari kara arero ore.

⁴ Laelave, eravo ureve hehe leivahaeape la eapai ve oharo ma: Elaviila ore harihu eharu iele karia, aeva Aualari Iele va haroapo hiki.

⁵ Ehovea Aualari rare avahaeape eharu lahua lahua le apearo, Kaia i meahaiapo ve (opore Aualari lahua lahua oaria, kai amua lahua lahua kara oaria).

⁶ Aka elaviila ve Aualari va haroapo, Oa iele. Eharu oaria are v'ila horeavape. Elaviila kara are v'ila apealula. Aeva, Amua Iesu Keriso haroapo hiki, eharu oaria are ve, elaviila oaria kara.

Iki horahora apavara kaherearalue

⁷ Aka uku haela lahovea ikiore au availa. Ehovea opore Aualari ore overa leivahaeape la haela, la eapai harihu eharu aiarape eapai hovea kelava lalavahaelula. Ereve iki mahuka, laelave ereve iki haeae leilula.

⁸ Aka eapai hiki elaro Aualari oropa ve lei veveke lei va ka. Ela eapai la lalavahaeakilava, veveke leivahaea va ka. Hovea hovea eapai hahaure la leivahaeakilava, elaviila heaha lei va ka.

⁹ E va kiva leivahaeaki — e va naoae leilula mai horahora haela ve oki hereavaki ave.

¹⁰ Ehovea e va ikiore haela, harihu aiarape la eharu la larikilava, ikihorahora haela ero la eavakilava, ere kara, e hovea, harihu aiarape la eapai larikilai.

¹¹ Laria, ehovea eve ikiore, iki mahuka la haela hai ka leivahaeakilai. Aka Keriso ere v'ila apape.

¹² Aka, e lahovea apavara hahaeae la leivahaeakilava, e va Keriso havahu mai haeae leivahaelula.

¹³ Laelave, arave apoheari aivau v'ila ikihorahora la leikilava, ara va mea oaria aivau le va ka, arave apoheari haeae leiki ave.