1 Corinth 7 - Pupu Oharo Āre 1963 Genese 1970 Rute 1972

Uva maepaki oki, dedehi mai, uva haure leiki mai

¹ E araro apevelavela leivahaeape la eharu ve kavale oharo ma: Veveke, haela ae uamari ae mai paea v'arekaea.

² Aka, e va airi pavora mai leivahaeaki ave, haela oaria elare uva laeakive, heroe: uva kara areve la vila havahu maepa va heroe.

³ Vila areve uva ve maea kiva leikive: uva kara areve vila ve maea kiva lahovea.

⁴ Uva elare maea hiki kiva leiva ka, areve vila kara. Vila elare maea hiki kekela va ka, areve uva kara.

⁵ Uva i vila ila elarelare hahaure hahaure v'arekaea, aiai perehekai la, ehovea ere i ivaiva auhohi leikive, la va heroe. Aireaki kai hareho kopakaeakive, heroe: Satan ero au amuraeaki ave.

⁶ Ara ma oharo pupu hovea maea va ka, aka ehovea e mahuka leivahaeaki ave.

⁷ O iele, ara v'ikivere haela oaria ara hovea leikive, heroe: aka haela oaria Aualari elarelare meru aiarape, aeva maria, aeva laria.

⁸ Laelave, ara dedehi i uavila maitava maria maeairo, Veveke, ere va ara hovea apeakilai.

⁹ Aka ere va horahora la leivahaeakilava, vilaita maepa va heroe, ere va korea iki kelavaki ave.

¹⁰ Uavila i vilaita ila ara maria maeaeaive, pupu hovea, o iele, ara ka, Amua ve pupu ka — Uva areve vila kahakurepalue.

¹¹ Aka, are vila harelapakilava, vila ae kalaealue, aka oropa la koarakive heroe. Vila kara areve uva haure kalailue.

¹² Ara va haela oaria maeaive, arave ikikekela, Amua ve oharo ka: Haela ae ve uva va ikikekelaki aue uamari, kai la uamari ikivere are i hareho aeakive, heroe, arero haure kalailue.

¹³ Uamari kara, areve vila ikikekelaki aue la leikilava, la uamari ikivere are i hareho aeakive, heroe, are arero haure kalailue.

¹⁴ Ehovea uamari areve kekelaki aue vila hehe leikilai, kai vila areve kekelaki aue uva hehe leikilai. Laria leiki aue la leikilava, eve akoremari kara heaha leivahaeakilai, aka ere va ma hoa hehe havahu.

¹⁵ Ikikekelaki aue haela ero haitapa va heroe. Lahovea haela elaviila ve pupu haha va ka: Aualari elaviilara havila ve itavape.

¹⁶ Uamari e, a v'ore ha? A va vila lei ovokake leikilai ha? Haela e, a v'ore ha? a uva lei ovokake leikilai ha?

¹⁷ Aka Aualari haela oaria ve ikiore hovea aiarape, Aualari haela oaria itavavahaeape la mai hovea leikive, heroe. Ara ma oharo hehe uvi haela oaria maeaeaive.

¹⁸ Peritome leipe haela ekalesia la leikilava, are la peritome mai haure kalailue. Peritome mai leikiaue la haela ekalesia haela la leikilava, are peritome mai kekela v'arekaea.

¹⁹ Peritome mai iele karia. Peritome aue mai iele karia. Aka Aualari ve pupu iele havahu.

²⁰ Haela ae va ekalesia haela leipe hoa ve la horova hakurepa v'arekaea.

²¹ A va haela ae ve au hahape haela leipe ha? Kekela v'arekaea. Ere ave hoa la haerapakilava, la okiharo kara horova auhohi leiki.

²² Ehovea Amua haela ae ve au hahape haela la itavakilava, la haela va Amua ve paraeape haela hovea leikilai. Hoveahovea, horova lahua leipe la haela Amua la itavakilava, la haela va Keriso ve au hahape haela iele.

²³ Ero kavale eapapo ve ilaea leivahaeape. Haela hiki ve horova arive ka kelavarue.

²⁴ Apavara, e haela oaria, ekalesia haela leivahaeape la hoa ve la horova kiva auhohi leivahaeaki va heroe.

²⁵ Vilaita karaki aue la marita v'ila ara Amua ve pupu kilea va ka. Aka ara havahu ve ikikekela ero maeaeakilai, ehovea arave ikikekela Aualari ve ikiheroe ve okiharo ve lei ehoe leipe.

²⁶ Laelave, ehovea ma hoa ve heraho maea iele, arave ikikekela veveke laria hiki apeakive.

²⁷ A va uva overa laeape ha? Arero paraeaki ikivere kalailue. A va uva karia ha? Aeka haropa v'arekaea.

²⁸ Aka, a va uva la laeakilava, a va haeae lei va ka. Mari dedehi vila la laeakilava, leia kara haeae ka: aka laria haela heraho koaravahaeakilai. Ara havahu ve ikikekela — arekaea.

²⁹ Aka ara maria maeaeaive — hare kepea oaria ka: uavila ila la haela oaria ere haela dedehi hovea apeakive.

³⁰ Hivavara arula la haela hi avahaeaki aue la haela hovea hovea leikive, heroe. Ikiveveke leilula haela ikiveveke leiki aue haela kara hoveahovea: ilaea leilula haela, eharu karia la haela hoveahovea.

³¹ Meahaiapo horova leilula haela, la horova hiki ikivere va arekaea, ehovea ma meahaiapo eharu karia leivahaeakilai.

³² Ara va ikivere e eharu v'ila ikihorahora v'arekaea. Uva laeaki aue haela are va Amua ve eharu kiva auhohi leivila, ehovea are va Amua ve ikivere horova leivila.

³³ Aka uva ila la haela ma meahaiapo eharu kekelavila, ehovea are uva ve ikivere horova leivila.

³⁴ Uamari i mari dedehi ila kara lahua lahua leilula. Mari dedehi Amua ve eharu ikivere leivila, ehovea are maea i ove ila hehe leikive ikivere. Aka vila ila la uamari ma meahaiapo eharu kekelavila, ehovea are ikivere vila ve ikivere hovea leikive.

³⁵ Ara ma oharo ero amuraeakive kilea va ka, aka ehovea ero hukapakive, kai ero mai mekakure amoeakive. Laria, e va Amua ve horova auhohi leivahaeakilai, heraho ka.

³⁶ Aka haela ae ve ikikekela areve ikivere mari dedehi haiapo lari hiki la kari, hovea ka, ehovea areve vila maepaki hoa karia leiki ave, heroe, la mari dedehi vila laeakive, haeae ka.

³⁷ Aka horova la ikikekela aheke la haela, areve ikivere horova leivila la haela — la haela areve mari dedehi aeavila hiki kekelavila, are kara veveke leivila.

³⁸ Laelave mari avaraki haela veveke leivila, aeka avaraki aue la haela kara veveke havahu leivila.

³⁹ Vila ve ovokake hoa uva are i hareho aeakive, pupu ila; aka vila la apakilava, areve ikivere haela ae arero laeakive, heroe, aka Amua ve la okiharo hiki.

⁴⁰ Aka arave ikikekela are lahua hiki aeakive, heroe. Arave ikikekela arave oharo Aualari ve Ove ve kilea oharo la.