1 Corinth 6 - Pupu Oharo Āre 1963 Genese 1970 Rute 1972

Ekalesia haela ve koto leiki mai

¹ Lehae ha? Eve haela ae haela va haeae la leikilava, e va Aualari kelavaki aue la haela, gavana haela oropa ve oharo hukavakive, heroe ha? Aeka: hehe haela la oharo heheavakive velavela lei va ka ha?

² E haveva ha? Hehe haela aireaki meahaiapo heheavakilai? Laelave, e hehe haela meahaiapo aireaki la heheavakilava, e va hovea ka eharu titaeka kara heheavakive ha?

³ E va haveva ha — elavila angel kara heheavakilai — laelave ma meahaiapo ovokake ve eharu heheava va ka ha?

⁴ Laelave, e va ma meahaiapo eharu la heheavakilava, e va la heheavaki horova naoae aiarakive heroe ha?

⁵ Ara ero lei makiri leiro. Eve leia ikiore haela karia ha? Eve elare apavara heheavakive hovea haela ae va karia ha?

⁶ Aka apoheari i apoheari ila elare heheavalula, aeva la heheavaki horova va ikikelavaki aue haela ve oropa ve.

⁷ Laelave eve haeae eapapo haroapo ma — e va elarelare hahai heheavalula. E va haeae la koarakilava, hihiri leve? Haela eve eharu korea la leikilava, kavale ka heheavalue, hihiri kara v'arekaea.

⁸ Aka, o iele, e kara haeae leilula: e kara elare apavara ve eharu korea leilula.

⁹ E haveva ha? Mai heaha la haela Aualari ve basileia aireaki ava va ka. E iki haeae ka kelavarue! Korea haela i Aualari kelavaki aue haela, airi pavora mai leilula la haela, kai mai heahaha leilula haela kai opore mai leilula la haela:

¹⁰ Eharu korea haela kai korea ikivere haela, ma heaha lala ihape leilula haela, o heaha haela kai moni korea haela: ere oaria Aualari ve basileia ava va ka.

¹¹ Eve uku haela laria leilula: aka, ero ma overa huhelavape, e va hehe overa leivahaeape, e va lei ehohoe leivahaeape Amua Iesu Keriso ve rare v'ila, aeva elaviilave Aualari ve Ove v'ila.

Ekalesia haela mai heaha leivahaea va ka

¹² Ara eharu oaria leivila, pupu haerapa va ka, aka la eharu uku veveke havahu ka. Ara eharu oaria leivahaeakive, heroe, pupu ka, aka la eharu arave Amua hovea lei v'arekaea.

¹³ Eapai are va eharau ve eharu: eharau are va eapai ve eharu: aka Aualari la eharu oaria hai ka leivahaeakilai. O iele, maea au karikila ehovea mai heaha ve, aka Amua ve horova ve, Amua kara va maea ve Amua havahu.

¹⁴ Aualari Amua lai urapape. Are elaviilara kara la urapakilai, areve aheke v'ila.

¹⁵ E haveva ha? Eve maea Keriso ve ukuku. Ara va Keriso ve la eharu kaili, korea haela ve eharu hovea leikive, heroe ha? Arekaea!

¹⁶ Lehae? E haveva ha, harari uamari koaraki la haela are i hareho korea haela le leikilai; ehovea oharo mari hape, Aivau orahokaila aivau haroapo hovea leikilai.

¹⁷ Aka Amua koaraki la haela, are Amua i hareho ove haroapo leivila.

¹⁸ Airi pavora mai oaoka lei hukauki! Mai heahaha lahua lahua ere va maea ve haeae havahu ka; aka airi pavora mai leivila la haela are elare maea heaha leivila.

¹⁹ Lehae ha? E ore va ka ha? Eve maea va Ove Veveke ve Hehe Uvi hovea hovea. La Ove Veveke eve ureve aeavila; E la Ove Veveke Aualari ve avape: e va elare eharu hiki va ka.

²⁰ Ehovea ero ilaea leivahaeape la kavale va eapapo. Laelave elare maea v'ila Aualari momorapuki: eve ove v'ila kara, ehovea la va Aualari ve eharu.