1 Corinth 4 - Pupu Oharo Āre 1963 Genese 1970 Rute 1972

Aposetolo haela ve horova Aualari avarape

¹ E haela oaria elaro maria kelavaki — Keriso ve horova haela, Aualari ve muruhari eharu ve kiva leilula haela,

² Iapaila: Kiva haela ere va horova kiva auhohi leivahaeaki va heroe.

³ Ara va horahora ka e va araro ma oharo v'ila heheavakilai, haela ae kara hoveahovea: o iele, ara elare mai kara heheava va ka.

⁴ Ehovea ara oki lahua ve eharu ore au leila, araro heheavaki haela va Amua hiki.

⁵ Laelave eharu elavelave ka heheavalue, aiai Amua ve kihoreraki hoa. Are la hoa muruhari apealula la eharu oaria hihika leivahaeakilai. La hoa Aualari elaviilara hareho hovea hovea momorapukilai.

⁶ Ara i Apollos ila ma eharu v'ila ihova hovea lamaeaila, ehovea ero kileavahaeakive. E va haela ae haela ae ve akea ve rare kailue.

⁷ Ehovea ero lahua lahua leita karikivahaeape? Akoreheari e, ave la eharu haela au avaraila ha? Aro aiarape la eharu, a lahua avape ha? La opore pelaea oharo kailue.

⁸ E Corinth haela ikivere leivahaeape erohoho eharu oaria overa aeape ha? E va amua hovea lahua leilula ha? O iele, ara ikivere e ela i hareho amua hovea leivahaeakive.

⁹ Ehovea arave ikikekela Aualari aposetolo haela aireaki havahu rare arilai, apihaeaki haela hovea. Ehovea ela va meahaiapo i angel i haela ila oropa ve hihika ihova hovea leilula.

¹⁰ Ela Keriso ve harihari ve ihape leiro, aka e va Keriso v'ila ikiore leivahaeairo. Haela ero momorupulula, ere elaro hahaure leivahaelula.

¹¹ Ikiki ma hoa ela eroa i karave koa ila, kai maheare apealula, kai kakare leivahaelula, kai apeaki uvi iele karia.

¹² Ela elare mai ve horova leilula: haela elaro o heaha la maeakilava, ela kavale oharo veveke hiki maeaelula, haela elaro haralaruakilava, ela va hihiri lei va ka.

¹³ Ere elaro heaha rare la leikilava, ela kavale havila oharo hiki maeaelula. Ere elaro vea meahaiapo ve erorova hovea la kelavalula, aiai ma hoa ela va aikilapaki eharu hovea.

Kileaki oharo aheke

¹⁴ Ara ma oharo ero makiri leikive haea va ka, aka ara ero arave akoremari hovea la maeaive.

¹⁵ Ehovea e va kilea haela 10,000 hovea la aeakilava, Keriso ve, e va oa oaria ka, ehovea ara Iesu Keriso ve oki ve oharo veveke v'ila ero erape.

¹⁶ Laelave, ara ero here leivahaeairo, e va araro airekai ekevahaeaki va heroe.

¹⁷ Ehovea ma, ara Timotheus eve leia paraeaive. Are arave akore havahu, Amua ve oki v'ila aheke iele: Are arave mai iele ero hihika kileavahaeakilai: Iesu Keriso ve la mai veveke, ara hehe uvi oaria ureve kileavahaevila la mai veveke.

¹⁸ O iele, eve uku haela pelaea leilula, ehovea ereve ikikekela ara eve leia elau va ka.

¹⁹ Haiapo ka, Amua ikivere la leikilava, ara eve leia elaukilai. Ara pelaea haela ve oharo ve aheke la hoa iele haropakilai.

²⁰ Ehovea Aualari ve basileia ve oharo hiki ka: are va iki ureve la aheke kara.

²¹ Eve ikivere lehae? Ara eve leia hihiri ila elaukilai, aka ikiheroe i harita harita ila ha?