1 Corinth 3 - Pupu Oharo Āre 1963 Genese 1970 Rute 1972

Hiru lahua lahua v'arekaea

¹ Apavara e, ara ero ove ila haela hovea kilea va ka, aka aivau haela hiki, ehovea e Keriso ve akoremari titaeka.

² Ara ero amae la avarape, eapai aheke ka, ehovea e va oropa hoa hovea ka: o iele, ma hoa kara e hovea havahu ka.

³ Ehovea eve ikikekela va aivau hovea hiki. Eve leia va ikiheaha oaria, hahari oaria, kai hiru lahua lahua oaria, laelave e va aivau hovea hiki, haela ve mai hovea hiki leilula.

⁴ Ehovea haela ae ve oharo maria, Ara Paul ve haela, haela ae ve, Ara Apollos ve; laelave e va meahaiapo mai hiki leilula.

⁵ Paul va leita ha? Apollos va leita ha? Erealila iroro arura haela, e va erealila ve oki ve iapai kelavape: Aualari haela oaria aiarape horova hovea hovea.

⁶ Ara ka hae apoporaupe, Apollos ma kakaitape; iele oaria Aualari aiarape.

⁷ Laelave, apoporaupe haela iele ka: ma kakaitape haela kara iele ka — aka iele oaria Aualari hiki aiaravila.

⁸ Au apoporaupe la haela kai ma kakaitape la haela va hovea hovea. Haela oaria kara ere havahu ve kavale avakive, ere leivahaeape horova hoveahovea.

⁹ Ehovea elaviila va Aualari ila horova leilula haela — e va Aualari ve apoporauki ita, e va areve ikivere uvi hovea.

Kilea haela ve horova ve ipi iele

¹⁰ Aualari araro avikiarape la ikiheroe meru ila hovea, ara uvi horova haela ikiore hovea va laila, ara va uvi ihau paparaehape: haela ae uvi akea ve kukilai. Aka haela oaria ereve la akea horova kiva auhohi leikive heroe.

¹¹ Ehovea ihau veveke ae va karia: Iesu Keriso va ihau veveke iele.

¹² Haela la ihau ve akea ve la kukilava, gold, aka silver, aka aitave hae, kavale eapapo ila, aka kora, aka rei i hohe eroe ila;

¹³ Areve horova aireaki hihika leikilai — areve hihika leiki hare le aeave — La hare ve hihika eharu va a iele. La a haela oaria ve horova ve iele hovea heheavakilai.

¹⁴ Haela ae leipe la horova veveke la aeakilava, are kavale veveke avakilai.

¹⁵ Haela ae ve horova a hai ka la leikilava, are havoavaki haela, aka are havahu ovokake leikilai, a ve la okiharo ve.

¹⁶ E ore va ka ha? E va Aualari ve hehe uvi iele. Aualari ve Ove eve ureve aeavila.

¹⁷ Haela Aualari ve hehe uvi heaha la leikilava, Aualari arero hai ka leikilai, ehovea Aualari ve hehe uvi hehe iele: E va la hehe uvi havahu.

¹⁸ Haela ae elare kekela amuraea va arekaea. Eve haela ae meahaiapo ve oki ve ikiore hovea la leikilava, veveke are ihape hovea leikive, laria are ikiore iele le leikilai.

¹⁹ Ehovea ma meahaiapo ve ikiore Aualari ve oropa ve ikihaveva hovea leive, ehovea oharo maria hape, Are ikiore haela ere havahu ve ikiore ve papaehaukilai.

²⁰ Aeka maria hape, Aualari ikiore haela ve ikikekela ore, iele karia.

²¹ Laelave e oaria haela v'ila pelaea kalaivahaelue, ehovea eharu oaria eve.

²² Paul, kai Apollos, kai Cephas, kai meahaiapo, kai ovokake, kai apaki maea, kai ma hoa ve eharu aiai aireaki eharu kara, ere oaria eve eharu.

²³ Ehovea e oaria Keriso ve: kai Keriso are va Aualari ve.