1 Corinth 16 - Pupu Oharo Āre 1963 Genese 1970 Rute 1972

¹ Hehe haela v'ila korukaiape la moni ve oharo ma: Ara Galatia ekalesia oaria maeaeape la horova, e kara hovea hovea leivahaeaki.

Moni korukaiakive ehovea Jerusalem apealula merava haela

² Hepetoma ve oropa hare, e oaria elare maea hovea moni aipevahaeaki, Aualari ero ikiheheroe leivahaeape hovea; laelave arave ekeki hoa, haela la korukaiaki horova kekela va ka.

³ Ara eve leia elauki la hoa, eve ikivere haela ve rare pepa haeaki: ara va la haela eve korukaiape moni ila Jerusalem paparaehakilai.

⁴ Aeva ara kara aukive hovea hovea la leikilava, ere araro koarai auvahaeakilai.

Paul havahu ve oharo uku, kai ikiheroe oharo

⁵ Ara va Macedonia ve oki aukive la hoa, ara eve leia kara pekakilai, ehovea ara va Macedonia oki aukive ikivere leive.

⁶ Ara ore va ka, ara eve leia perehekai aeakilai, maora hoa hareho aeakilai la; laelave, ara lela oki hahi ve aukilai, e kai araro hukapakilai.

⁷ Ara ikivere va ka ero naoae naoae hahi hoa hiki eavakive: Aualari ve ikivere hovea, ara e i hareho aeakilai.

⁸ Aka ara Ephesus aiai Pentecost hurae hoa.

⁹ Ehovea arave leia horova eapapo oki le hapape — aeva iri haela oaria le apearo.

¹⁰ Timotheus eve leia la pekakilava, are eve leia aeaki hoa horahora kalaivahaealue, ehovea are Amua ve horova leivila, ara hovea hovea.

¹¹ Haela arero haure lei v'arekaea. Arero havila ila arave maia kai kiparaeakive. Ara va ikivere are i ekalesia haela ila hareho ovohae eavavahaeakive.

¹² Ara va ikivere eapapo, elave apoheari Apollos i eve leia ekalesia haela ila hareho aukive. Aka ma hoa are aukive ikivere lei va ka. Are va aireaki, mea veveke hoa, eve leia pekakilai.

¹³ Kiva auhohi leivahaeaki, iki aheke kelavaila. E va haela havahu, aheke iele leivahaeaki.

¹⁴ Eva horova oaria ikiheroe mai v'ila leivahaeaki.

¹⁵ Ara ero here leive, apavara e; e v'ore Stephanos ve lalava haela, ere va Achaia ve oropa ekalesia haela, ae va ere mea oaria aposetolo ve horova hukapailula.

¹⁶ Ereve kilea oharo iapaila, aeva ereve auhohi koarailula haela oaria kara.

¹⁷ Ara va ikiveveke ehovea Stephanos i Fortunatus i Achaiacus ila ekevahaeape, ehovea ere eve mai hovea elaro hukapape.

¹⁸ Ere va araro ikiveveke leipe, ere ero leilula la mai hovea, laelave ereve la mekakure iki auhohi kelavaki.

¹⁹ Asia ve ekalesia oaria ero ikiheheroe oharo paraeaive: Aquila i Priscilla ila Amua ve ikiheroe ero paraeaive, ereve uvi ve la ekalesia haela kara.

²⁰ Apavara oaria ero ikiheroe oharo paparaehairo. E va elarelare Aualari ve ikiheroe mai leivahaeaki.

²¹ Ara havahu ve mai ve ma ikiheroe oharo ara paraeaive.

²² Amua Iesu Keriso ikiheroe leiki aue la haela are va heaha iele.

²³ Amua Iesu Keriso ve ikiheroe meru e i hareho apeaki.

²⁴ Ara ero oaria ikihuru havahu hela leiro, ehovea Iesu Keriso ve rare ve.