1 Corinth 15 - Pupu Oharo Āre 1963 Genese 1970 Rute 1972

Api kai urouki oharo

¹ Oharo aeka ma: Apavara — ara ero kileape la iroro oharo ara ero hihiki amoeakive: e va la oharo avi aheke le leivahaeape.

² Ara ero iroro ape hoa kileape la oharo e iki iele la kelavakilava, e va are v'ila kara lei ovokake leivahaeakilai. Aka e va naoae kelavape ha?

³ Ehovea ara oropa avape la eharu ara ero aiarape — Keriso elaviilave mai heaha v'ila apape, buka hape la oharo hovea.

⁴ Ere arero karu ihape: are kai hare ilehoila lei uroupe, buka hape la oharo hovea.

⁵ Arero eavape haela ae va Cephas, 12 haela ve haela aea la.

⁶ Aireaki hoa haela 500 hoa haroapo arero eavape — la haela perehekai oaria apeapea ma hoa, haroapo haroapo hiki avuku overa urupape.

⁷ Aireaki James arero eavape. Aireaki aposetolo haela oaria arero eavape.

⁸ Aireaki havahu, ara kara arero eavape, araro aireaki epape ekalesia la.

⁹ Ehovea ara va aposetolo haela oaria va ipi ve — iele aposetolo rare avakive hovea ka, ehovea ara Aualari ve ekalesia haela oaria hararuavahaeape.

¹⁰ Aka, ehovea Aualari ve ikiheroe meru iele, ara mahovea aeavila; aeva are araro avikiarape la ikiheroe meru naoae au leila, ehovea ara ka horova eapapo leipe — haela oaria va perehekai. Aka la horova ve iele ara va ka, o iele araro koarape Aualari ve ikiheroe meru.

¹¹ Laelave — ere, aka ara, ela oaria iroro oharo avahaeape — e kara iki kelavape.

¹² O iele, Keriso api kai uroupe la iroro oharo haela la leikilava, e va haela uku leari maeakilai, Haela apihai kai urahuka va ka?

¹³ Api kai urouki la mai karia la leikilava, Keriso kara api kai urou va ka.

¹⁴ Keriso api kai urouki aue la leikilava, elaviilave iroro oharo va iele karia — eve ikikekela kara iele karia.

¹⁵ O iele, ehoveala, ela va Aualari ve oharo opore vavahaelula; ehovea ela va maria vavahaeape — Aualari Keriso karu ve lai urapape. Aka apihaeaki haela aireaki urahukaki aue la leivahaeakilava, Keriso kara karu ve urou va ka.

¹⁶ Ehovea apihaeape haela urahukaki aue la leikilava, Keriso kara api kai urou va ka.

¹⁷ Keriso api kai urouki aue la leikilava, eve ikikekela kara iele karia, e va mai heaha ila apealula.

¹⁸ Ehoveala, Keriso v'ila avuku overa urupape la haela hai ka leivahaeape.

¹⁹ Elaviila ma meahaiapo hoa hiki Keriso ve ovokake la aeakilava, elaviila va heraho le leivahaeakilai.

²⁰ Aka Keriso api kai uroupe: Are va avuku urupalula la haela ve oropa haela la.

²¹ Ehovea haela ve okiharo ve apaki maea horerape — laelave haela ve oki ve api kai uroukive la maea kara horerape.

²² Ehovea Adam ve oki v'ila haela oaria apihaealula; aka hovea hovea Keriso ve oki v'ila haela oaria lei ovokake leivahaeakilai.

²³ Aka haela va hoa hoa ila — oropa Keriso, aire areve ekeki hoa areve la haela iele.

²⁴ Aireaki mea aeaki hoa iele. La hoa Are va oropa aheke haela i Amua haela oaria ila ve hoa haerapakilai, aireaki Are basileia elaviilave Oa Aualari avarakilai.

²⁵ Ehovea are va Amua lei lei areve iri haela oaria loa huharakilai.

²⁶ Are va aireaki havahu apaki maea hai ka leikilai.

²⁷ Ehovea are va eharu oaria elare loa huharavape. Aka Are elare loa eharu oaria huharava?-?kive maeape la oharo va iele, eharu oaria areve loa ipi ve aipevahaeape la Aualari ka lahua.

²⁸ Eharu oaria Areve ipi ve leivahaeaki la hoa, Akore kara areve loa ipi ve aeakilai: laelave Aualari va eharu oaria ve akea ve.

²⁹ Laria leiki aue la leikilava, apihaeaki haela urahukaki aue la leikilava, haela apihaeape haela ve bapatiso leve leilula?

³⁰ Elaviila hare oaria heraho hiki leilula iele ehovealeve ha?

³¹ O iele, ara elaviilave Amua Iesu Keriso v'ila o aheke la maeaive, ehovea ara e v'ila ikiveveke hare oaria leivila, are hare oaria kara apaki maea iele.

³² Ara Ephesus animala merava, haela ve mai hovea, hahari la leikilava, apihaealula haela urahukaki aue la leivahaeakilava, ara le veveke koarakilai? Elaviila eapai i ma ila lala opoa le apihaeakilai.

³³ E horahora kalaivahaelue: haela heaha koarai auvahaelula la haela heaha rare aeakilai.

³⁴ Mai ehoe ve ikikelavaki, mai heaha leivahaea v'arekaea: ehovea uku haela Aualari ve Rare haveva iele. Ara ma oharo ero makiri leivahaeakive kimaeaive.

³⁵ Aka uku haela apevelavela maria leivahaeakilai — Apihaeaki la haela leari lei urahukakilai ha? Ere maea leahovea urahukakive ha?

³⁶ Ihape haela e, e va aporaki la eharu apakive la okiharo ve hiki ovokake leikilai.

³⁷ A va aporaki la eharu are va aireaki la maea lei va ka, are va wheat hae aka hae aea, hoveahovea.

³⁸ Aka Aualari areve ikivere maea hovea avarakilai — hae oaria elare maea hovea.

³⁹ Aivau oaria hoveahovea ka: Haela ve aivau ka lahua, animala ve aivau ka lahua, ori kara, aeva ekaka kara, lahua lahua.

⁴⁰ Aeva kaia ve maea le apearo, aeva meahaiapo ve maea kara le apearo: Kaia ve maea ka lahua, aeva meahaiapo ve la maea ka lahua.

⁴¹ Hare ve haharika le aeave, papare kara, kou oaria kara: kou oaria ereve haharika lahua lahua.

⁴² Api kai urouki la maea ka laria. Au aporape eharu va poae leiki eharu: au ikaeaki la iele va poae leiki aue eharu.

⁴³ Aporaki hoa heaha: ikaeaki hoa mekakure iele. Mahuka ila aporape, aheke ila ikaeakilai.

⁴⁴ Meahaiapo maea la aporakilava, urouki hoa Ove eharu iele. O iele, meahaiapo maea ka lahua, ove ve maea ka lahua.

⁴⁵ Ehovea overa oharo maria hape, Oropa haela, Adam, ovokake haela le leipe: Aireaki la Adam va ove ve ovokake avape.

⁴⁶ O iele, oropa eharu ove va ka, aka maea ve eharu: ove eharu aireaki.

⁴⁷ Oropa haela va meahaiapo eharu, kekele ve eharu: aireaki haela va kaia ve eharu.

⁴⁸ Kekele la karikipe la haela hovea, meahaiapo haela oaria ka laila. Kaia ve la haela hovea, kaia ve haela kara laria.

⁴⁹ Elaviila kekele ve karikipe la haela ve maea hovea hovea leivahaeape: laelave elaviila kaia ve la haela kara hovea hovea leivahaeakilai.

⁵⁰ Ara ero mari maeaeaive, apavara e, Aivau i apu ila la eharu Aualari ve basileia aea va ka: poae leiki la eharu, poae leiki aue eharu aea va ka.

⁵¹ Ara ero muruhari eharu v'ila maeaeaive. Elaviila oaria avuku urupa va ka; aka elaviila oaria maea koelarikilai:

⁵² Hoa haroapo iele, ovohae apukilavaki hoa haroapo hovea, mea maeaila puva hohoaki la hoa. Ehovea puva hohoakilai, aire apihaeape haela oaria mekaka hiki urahukakilai: elaviila oaria lahua leivahaeakilai.

⁵³ Ehovea ma poae leiki eharu are va ovokake hiki leikilai: ma apaki maea va ove ovokake eharu hovea koelarikilai.

⁵⁴ Laelave, ma poae leiki eharu, poae leiki aue eharu hovea leiki la hoa, ma apaki maea apaki aue eharu hovea koelariki la hoa, overa hape oharo iele le leikilai: Ovokake Iele apaki hoa le heaorapape.

⁵⁵ Apaki hoa e, ave kakare iele lahoa? Kapu ita e, a va learia heaorapakilai ha?

⁵⁶ Apaki hoa ve kakare va mai heaha. Mai heaha ve aheke va pupu la.

⁵⁷ Ara Aualari morapaeavila, ehovea elaviila Amua Iesu Keriso ve oki v'ila heaha le heaorapape.

⁵⁸ Laelave, ikiheroe, apavara e, e va aheke iele epavaila; Amua ve horova kiva auhohi leivahaeaki, ehovea e v'ore, eve horova, Amua ve okiharo ve, naoae naoae lei va ka.