1 Corinth 14 - Pupu Oharo Āre 1963 Genese 1970 Rute 1972

Peroveta meru: Uri lahua lahua ve meru

¹ Ikiheroe mai ikivere leivahaeaki; aeva ove ve meru ikivere leivahaeaki, iele ehovea peroveta oharo arive.

² Ehovea uri lahua lahua hukavavila la haela are va Aualari hiki la oharo maeaevila, haela va ka: ehovea areve la oharo haela oaria iapa va ka. O iele ara va ove ve muruhari eharu hukavavila.

³ Aka peroveta oharo avila la haela areve la oharo va haela lei veveke leiki oharo, kai hakakaeaki oharo kara.

⁴ Uri lahua lahua hukavaki la haela are elare hiki lei veveke leikilai, aka peroveta oharo avila la haela are va ekalesia haela oaria lei mekaka leivahaevila.

⁵ Ara va ikivere e oaria uri lahua lahua hukava va heroe, aka ara ikivere eapapo e peroveta oharo avahaeakive: ehovea peroveta oharo avila haela are uri lahua lahua avila la haela ve akea ve, aka uri lahua lahua avila la haela, veveke, are la oharo au helarikive, laria are ekalesia haela lei mekaka leivahaeakilai.

⁶ Iapaila, apavara: Ara va eve leia uri lahua lahua hukavakive la pekakilava, ara ero lei mekaka leivahaea va ka. Aka ero lei mekaka leivahaeaki okiharo va iki ureve oharo kileakive, aeva ikiore oharo, aeva peroveta oharo, aeva kilea oharo veveke.

⁷ O iele, au karikipe eharu, meovo hivi aka aori hivi hovea, ere va auhare hihika hohoaki aue la leikilava, ereve iele haela ore learia leivahaeakilai ha?

⁸ Aeka āpa naoae naoae la koakilava, leita mare ve horerakilai ha?

⁹ E kara, e va ape oharo hihika hukavaki aue la leikilava, eve oharo ve iele ore leita leikilai? Ehovea eve oharo naoae naoae hiki.

¹⁰ O iele, meahaiapo ve āra lahua lahua oaria apearo, ere oaria iele ila.

¹¹ Laelave, ara āra ve iele horahora la leikilava, ara oharo lahua lahua hukava haela oropa ve merava haela hovea leikilai. Are kara ara ve oropa ve haela lahua iele.

¹² Laelave, e kara, ehovea e va ikivere ove veveke ve meru koarakive, e va ekalesia haela ve leia mekaka leivahaeaki okiharo haropaki.

¹³ Laelave — uri lahua oharo hukavaki haela ivaiva leiki — areve la oharo helari va heroe.

¹⁴ Ehovea ara uri lahua ivaiva la leikilava, arave ove ivaiva leive, arave ikiore va iele karia.

¹⁵ Lehae ha? Ara ove v'ila ivaiva leikilai: ara ikiore v'ila kara ivaiva arilai — ara va hivi va ove ve i ikiore v'ila helakilai.

¹⁶ Maria leiki aue la leikilava, a va ove v'ila haela la momorapuki hoa, oharo oaria horahora la haela ave, thank you oharo ve hita oharo learia arilai: ehovea ara ave la oharo oaria mekari iapa va ka.

¹⁷ Ehovea a va thank you oharo hovea hovea arilai, aka la haela ae are va hovea hovea ka.

¹⁸ Ara va Aualari thank you oharo ave, ehovea ara uri lahua lahua ve horova oaria, e ka perehekai.

¹⁹ Aka ekalesia ureve, ara va ikivere eapapo oharo haroapo haroapo hiki hihika hukavakive, aeva ara va ikivere perehekai iele oharo maeokoko uri lahua lahua hukavakive.

²⁰ Apavara, e va akoremari ve ikiore hiki hovea kalaivahaelue. E va mai heaha v'ila akoremari titaeka hiki leivahaeakive, heroe, aka ikiore v'ila, haela havahu leivahaeakive.

²¹ Pupu ve buka mari hape, Ara va uri lahua i ape iilu lahua ila haela ve oki ve, ara ma haela oharo maeaeakilai, aka ere arave oharo iapa va ka. Amua laria ape.

²² Laelave uri lahua lahua va ihova hiki, ehovea ikikelavaki haela ka, aka ehovea iki kelavaki aue haela: Peroveta oharo ikikelavaki aue haela v'ila hovea lei va ka, aka iki kelavalula haela ve hovea leivila.

²³ Laelave, ekalesia haela oaria ita haroapo la korukaiava?-?haeakilava, kai haela oaria uri lahua lahua la hukavakilava, mahokaea ve iki kelavaki aue haela ereve la naoae oharo la iapakilava, ere va ero oaria iki haveva rare le arilai.

²⁴ Aka haela oaria peroveta oharo la avahaeakilava, aeva iki kekelaki aue haela aka haveva haela la pekakilava, haela oaria arero heheavi le hahakilai.

²⁵ Laelave areve iki ureve hihika le leikilai. Are va haro ekaopi Aualari morapaeakilai. Are e v'ila maria maeaeakilai, Aualari e i hareho aeavila.

Ivaiva ve korukaiaki hoa Aualari ve morapaeaki okiharo kiva auhohi leivahaeaki

²⁶ Apavara: Lehae ha? E oaria hareho korukaiavahaeaki hoa, e haela oaria hivi ila, kai kilea oharo ila, kai oharo lahua ila, iki ureve oharo ila, kai uri helariki horova ila. Eharu oaria ehovea Aualari ve rare morapaeakive, heroe.

²⁷ Haela ae uri lahua lahua la hukavakilava, e va haela orahokaila aka ilehoila hiki laria heroe; aeva hareho hoa haroapo va arekaea: aeva haela ae la uri helariki va heroe.

²⁸ Uri helariki haela karia la leikilava, uri lahua lahua haela hehe uvi ureve oharo e va arekaea. Areve oharo elare iki ureve kai Aualari oropa ve hiki, heroe.

²⁹ Peroveta haela kara haroapo haroapo hiki, heroe: aeva haela ae va arero heheavakive.

³⁰ Haiavaki haela ae va oharo arive ikivere la leikilava, oropa haela karia leikive, heroe.

³¹ E oaria peroveta oharo haroapo haroapo laria arive kara, ehovea haela oaria hakakaeakive kai ore leivahaeakive.

³² Aeva peroveta haela elare ove kiva leikive ore.

³³ Ehovea Aualari va naoae naoae leiki Aualari va ka: aka Are va ikivere hehe uvi oaria ureve havila hiki leikive.

³⁴ Uavila hehe uvi ureve harita apeakive, heroe. Ere va oharo hihika ka hukavalue. Ere va oharo iapakive, heroe; pupu oharo laria hape.

³⁵ Ere va eharu ae ore leikive ikivere la leivahaeakilava, ere elare vilaita elare ita havahu apevelavela leivahaeakive: ehovea uavila hehe uvi ureve oharo arive, leia va makiri leiki eharu va la.

³⁶ Lehae ha? Aualari ve oharo eve leia ve ekepe ha? Aka Are va e hiki la maeaeape ha?

³⁷ Haela ae, elare peroveta rare hovea, aka ove ve rare ila la kekelakilava, are ore leikilai, ara ero paparaehaki ma oharo va Amua havahu ve pupu oharo.

³⁸ Haela ae haveva la leikilava, heroe, are haveva la.

³⁹ Laelave, apavara, e va peroveta oharo arive ikivere, aeva uri lahua lahua horova kokakaukalue.

⁴⁰ Eharu oaria ehoe hiki, auhohi leivahaeakive, heroe.