1 Corinth 13 - Pupu Oharo Āre 1963 Genese 1970 Rute 1972

Oropa meru va Ikiheroe

¹ Ara va haela i aneru ila ve uri oaria la hukavakilava, kai ikiheroe mai haveva la leikilava, arave ara va āpa hi aeka karuku karuku oaria hovea.

² Ara va peroveta horova ore la laikilava, ara muruhari i ikiore eharu oaria ore la leikilava, kela ehoaha hareavakive hovea, aka ikiheroe mai leiki aue la leikilava, ara iele karia.

³ Ara va eharu oaria merava haela ailarakilava, arave maea ara a harive avilarakilava, aka ikiheroe aue la leikilava, ara veveke lei va ka.

⁴ Ikiheroe leivila haela va haiapo iele ikihuru hiki leivila; ikiheroe leivila haela haela ae ve eharu ikivere lei va ka; ikiheroe leivila haela pelaea lei elare kekela va ka.

⁵ Are mai haiae lei va ka; elare eharu haropa va ka; hihiri elavelave lei va ka; heaha kara kekela va ka;

⁶ Mai haiae ve ikiveveke lei va ka, aka o iele ve ikiveveke leivila;

⁷ Heraho oaria ikihairihairi lei va ka; eharu oaria ikikekelavila; eharu mekaka oaria ikivere leivahaevila; iki aheke leivila.

⁸ Ikiheroe mai karia lei va ka: aka peroveta oharo oaria karia leivahaeakilai; uri lahua lahua oaria karia leivahaeakilai; ikiore oaria hai ka leivahaeakilai.

⁹ Ehovea elaviilave ikiore ma hoa ukai hiki; elaviila peroveta oharo uku hiki arula.

¹⁰ Aka eharu mekakure leivahaeaki la hoa, hakakaea hiki la eharu karia leivahaeakilai.

¹¹ Arave akore hekai hoa ara va akore hekai ve oharo hovea hukavape; ara va akore hekai hovea oharo iapape, kai akore hekai hovea ikikekelape. Aka arave haela hoa, ara akore hekai ve la eharu haitapape.

¹² Ehovea elaviila ma hoa eharu ma ureve ove hovea eavavahaelula, murumuru hiki: aireaki la hoa elaviila hihika eavavahaeakilai. Ara va ma hoa uku eharu hiki ore: aireaki la hoa ara va ore havahu leikilai, hoveahovea Aualari araro ore leive.

¹³ Ma hoa, aheke apealula eharu ilehoila — ikikekela mai, kai ikivere mai, kai ikiheroe mai: Aka ma eharu ilehoila ve oropa eharu iele va ikiheroe mai.