1 Corinth 12 - Pupu Oharo Āre 1963 Genese 1970 Rute 1972

Ove meru lahua lahua ve iele haroapo

¹ Ove ve la oharo, ara va ikivere e haveva va kalaivahaelue.

² E va ore, e va ita lahua haela; oropa e va harihu lahua lahua momorapupe. La harihu eharu oaria ero au amuraeape.

³ Laelave, ara ero kirive, Aualari ve Ove ila oharo avila haela, Iesu ve rare heaha rare e va ka. Aeka, haela va Ove Veveke ve la okiharo ve hiki Iesu Amua rare arilai.

⁴ Ikiore meru lahua lahua va oaria, aka Ove va haroapo.

⁵ Horova kara lahua lahua oaria, aka Amua haroapo hiki aeave.

⁶ Horova ve okiharo oaria apearo, aka Aualari haroapo hiki la okiharo va kiva leivahaevila.

⁷ Ove ve iele haela oaria aeakila, ehovea erero lei mekaka leivahaeakive.

⁸ Ehovea Ove va haela ve ikiore la avarakilai; haela aea va ore leiki okiharo aea la Ove avarakilai.

⁹ La Ove haela ikikekela veveke avarakilai, haela ae maea veveke leikive la horova.

¹⁰ Haela ae va ikiore horova aea, haela ae va peroveta horova; haela ae ove lahua lahua ore leikive; haela ae va uri lahua lahua; haela ae va uri helarikive.

¹¹ Aka ma eharu oaria Ove haroapo hiki aiaravila: Ove ve ikivere hovea haela lahua lahua aiaravila.

Maea ve ukuku ve ihova

¹² Ehovea, hovea hovea, maea haroapo va ukuku oaria ila, aeva la ukuku hareho korukaeai maea haroapo hovea leivila, Keriso kara laria.

¹³ Elaviila hareho maea haroapo hovea leivila, ehovea Ove haroapo elaviilara bapatiso leivahaeape: Jew haela i Ita lahua haela oaria hareho: au hahaeape haela i overa paparaehape haela ila. Elaviila oaria hareho Ove ma haroapo herehere lalavahaeape.

¹⁴ Ehovea maea va hakaea haroapo hiki ka, areve iele hakakaea oaria.

¹⁵ Lehae, loa maria la maeakilava, Ara mai va ka, laelave ara maea ve eharu va ka; are iele maea ve eharu ka ha?

¹⁶ Avako maria la maeakilava, Ara ovohae va ka, laelave ara va maea ve eharu va ka; are iele maea ve eharu va ka ha?

¹⁷ Maea hareho ovohae hiki la leikilava, are va learia iapakilai ha? Are va hareho avako hiki la leikilava, are muo learia koakilai ha?

¹⁸ Aka Aualari ikivere leipe hovea, are maea ve eharu lahua lahua oaria karikivahaeape.

¹⁹ Ere oaria hareho hakaea haroapo hiki la leikilava, maea laria lei aeakilai ha?

²⁰ Ere va maria: hakakaea oaria va maea haroapo hovea hovea leive.

²¹ Ovohae mai maria maea va ka, Ara aro ikivere lei va ka. Haro maria loa maea va ka, Ara ealilara kekela va ka.

²² Iele havahu, mahuka leilula la maea ve ukuku, erero kara maea ikivere eapapo leive.

²³ Elaviilave ikikekela veveke havahu ka la maea ve eharu, elaviila momorapulula. Elaviilave maea ve eharu heaha ere va mekaka hovea leivahaeakive.

²⁴ Ehovea elaviilave maea ve ukuku mekaka, ere va mekaka overa leivahaeape: aka Aualari maea veveke maria karikipe, ehovea mekaka aue la ukuku are kai momorapupe.

²⁵ Laelave, maea ve ukuku lahua lahua leivahaea va ka; aka la ukuku elarelare kiva leivahaeakilai.

²⁶ Maea ve uku ae va kakare la leikilava, uki oaria hareho kakare leivahaeakilai. Maea ve eharu ae va veveke la leikilava, maea ve eharu oaria are i hareho ikiveveke leivahaeakilai.

²⁷ E oaria Keriso ve maea. E va areve maea ve eharu oaria.

²⁸ Aualari ve ekalesia haela uku are va aposetolo leivahaeape, uku peroveta haela, uku kilea haela: aireaki va horova lahua lahua haela, maea veveke leilula haela, koaraki haela, aka horova kiva leivahaelula haela, uri lahua lahua ore haela.

²⁹ Haela oaria hareho aposetolo horova leilula ha? Haela oaria va kilea haela ha? Haela oaria horova lahua lahua oaria ore ha?

³⁰ Haela oaria maea kakare veveke leikive ore ha? Haela oaria uri lahua lahua hovea leivahaelula ha? Haela oaria uri helariki va ore ha?

³¹ E va ikiore mekaka hiki ikivere leivahaeaki: Aka ara ero okiharo veveke iele kileakilai.