1 Corinth 11 - Pupu Oharo Āre 1963 Genese 1970 Rute 1972

Ekalesia korukaiavahaeaki hoa uavila haro iilu oreauki

¹ E va araro airekai ekevahaeaki, ara ka laria, Keriso airekai auvila.

² Ara mahau ero momorapuve, ehovea e eharu oaria v'ila araro iki kelavalula, ae va ara ero kileavahaeape la pupu oaria e kiva leivahaelula.

³ Aka, ara ikivere e ore leivahaeaki, haela oaria ve haro va Keriso la; uavila oaria ve haro vilaita la, aeva Keriso ve haro va Aualari.

⁴ Ivaiva i peroveta oharo ila avila la haela, are haro iilu la pavakilava, are haro haeae le leikilai.

⁵ Aka haro iilu karia ila ivaiva i peroveta oharo ila avila la uamari, are haro haeae leikilai, ehovea are laria la leikilava, areve haro haeka hovea leivila.

⁶ Haro hihika leivila la uamari, veveke maria, areve haro iele makive, aka areva haro haeka lei makiri la leikilava, veveke, areve haro pura hahakive heroe.

⁷ O iele, haela ve haro pura haha v'arekaea, ehovea arero Aualari ve maea hovea karikipe, ehovea Aualari morapaeakive. Aka uamari are va haela ve morapaeaki eharu.

⁸ Ehovea haela uamari ve au koelalila, aka uamari haela ve koelaripe.

⁹ Haela kara uamari ve au karikila, aka uamari haela ve karikipe.

¹⁰ Laelave uamari ve haro aheke ve ihova korakive, heroe, ehovea aneru ve.

¹¹ Lae vi va, Amua ve oropa ve, uamari lahua pava va ka; haela kara lahua pava va ka.

¹² Ehovea, hovea hovea, uamari haela v'ila karikipe, haela kara uamari v'ila karikipe, aka eharu oaria Aualari v'ila karikipe.

¹³ E kai auhohi kelavaki — Veveke ha? Uamari haro hihika lei Aualari ve ivaiva arive ha?

¹⁴ Au karikivahaeape meahaiapo eharu oaria ero kileavahaea va ka ha? Haela ve haro koro heahapiki la leikilava, la va makiri leiki eharu.

¹⁵ Aka uamari ve haro koro heahapiki la leikilava, la va areve lei veveke leiki eharu, ehovea are haro koro avape, ehovea haro kokaukakive.

¹⁶ Haela ma oharo v'ila ape hahari ikivere la leikilava, ara va pupu aeva karia; ekalesia ve pupu kara laria hiki.

Areto haeae leiki mai

¹⁷ Ara va ma oharo v'ila ero momorapu va ka, ehovea eve korukaiaki hoa e va auhohi leivahaea va ka.

¹⁸ Oropa oharo ma; eve korukaiavahaeaki hoa, e va elarelare hiruhiru oaria; ara la oharo overa iapai.

¹⁹ Ehovea e va ikikekela hiru lahua lahua hihika leivahaeakive, heroe, ehovea laria, haela mekaka haela oaria hihika eavavahaeakilai.

²⁰ Aka, eve korukaiavahaeaki hoa e va Amua ve hurae o iele leivahaea va ka.

²¹ Ehovea uku haela oropa elare eapai kaili laralula — uku haela eroa haealula, uku haela ma oaria lala ihape leilula.

²² Lehae? E va elare uvi karia, ehovea eapai i ma ila larive. Aka, e va Aualari ve ekalesia naoae naoae leilula, kai merava haela lei makiri leivahaealula. Ara ero laria oharo maeaeakilai ha? Ara ero momorapukilai ha? Ara ero momorapu va ka.

²³ Ehovea ara Amua ve aeape la eharu ara ero aiarape — maria — Amua hihila epape la oroa Are pai kaivape.

²⁴ Are, thank you, oharo a pai haivavaela mari maeaeape, Kaili le ila, ma va arave maea, e v'ila hai ka leipe: maria lei Araro iki kelavaki.

²⁵ La kara, Are hekako kaivi ma lala oharo ape maria, Ma hekako arave apu ve la oharo are; e va lariki la hoa, araro iki kelavaki.

²⁶ Ehovea e mea oaria ma pai i hekako ve ma ila laralula hoa, e va Amua ve apape ihova lei lei areve aeka kihoreraki hoa.

²⁷ Laelave — haela ma Amua ve pai i ma hekako ila haeae la larikilava, are va Amua ve maea i apu ila ve la haeae ve mehau avakilai.

²⁸ Haela elare iki kai heheavi ehoe la leikilava, are la pai i hekako ila larilai, heroe.

²⁹ Ehovea mai haeae ila la eapai i ma ila larikila la haela, are elare heaha le leikilai, ehovea area Amua ve maea iele kekela va ka.

³⁰ Laelave, eve uku haela mahuka leivahaea aheke leivahaea va ka; uku haela avuku i apealula.

³¹ Ehovea elaviila elare laheheavakilava, haela elaviilara heheava va ka.

³² Laelave eve eapai larive korukaiavahaeaki hoa, haela ae haela ae la kari va heroe.

^33-34 Haela ae eroa la leikilava, are elare ita havahu eapai le va heroe, e va hareho korukaivahaeaki hoa e haeae leivahaeaki ave. Ara va oharo kepea, ara va eve leia pekaki la hoa hukavakilai.