1 Corinth 10 - Pupu Oharo Āre 1963 Genese 1970 Rute 1972

Israel haela ve haeae kelavaki

¹ Apavara, oharo aeka ma: e haveva kalaivahaelue: elaviilave papa haela meuru aeravahaeape, aka ere oaria ahea ma ve elahukape.

² Ere oaria Moses v'ila la meuru i ahea ma ve bapatiso leivahaeape.

³ Ere oaria la ove eapai haroapo hareho lalavahaeape.

⁴ Ere oaria la ove ma haroapo hareho lalavahaeape: ehovea ere ereve airekai aupe la ove have ve ma lalavahaeape. La have va Keriso.

⁵ Aka ereve uku haela Aualari ikiheaha leipe: la haela huakara ve leia apihaeape.

⁶ Ma eharu elaviila ve ihova hovea leivahaeape, ere eharu heaha ikivere leivahaeape la mai elaviila leivahaeaki ave.

⁷ E kara Aualari lahua lahua ka momorapulue, ere momorapupe la mai hovea: Overa buka oharo maria hape, Haela oaria va eapai i ma ila larive ikivere leivahaeape: ere erau arive ikivere leivahaeape.

⁸ Ere leivahaeape la airi pavora mai, elaviila leivahaea v'arekaea. Ere leivahaeape la hare, ereve haela 23,000 hihilauvahaeape.

⁹ Ere uku haela Aualari amuraeape la mai hovea, elaviila Keriso kamuraealue. Ekaroa erero haeape, ehovea la haeae.

¹⁰ E va ikihairihairi kalaivahaelue. Ere ikihairihairi leivahaeape, laelave haela haeaki la aneru, erero haeape.

¹¹ Ma eharu oaria ere v'ila leivahaeape, elaviilave ihova hovea, ehovea elaviilara kileavahaeakive ehovea elaviilave hoa meahaiapo ve hita hoa.

¹² Laelave, haela ae elare aheke epavila la kekelakilava, kiva leiki, are hilauki ave.

¹³ Ero kurupaeaki la eharu, haela oaria kara kurupaealula: Aka Aualari ve mai ehoe, laelave are eve aheke hovea hiki kurupaeakilai. La kurupaeaki hoa kara, ara ero ovokake okiharo avarakilai, laelave e va hoveahovea leikilai.

Harihu lahua lahua kakelavarue

¹⁴ Laelave, apavara e, Aualari lahua lahua morapaeaki mai oaoka lei hukauki.

¹⁵ Ara ma oharo ero ikiore haela hovea maeaevila. Arave oharo iki auhohi kelavaki.

¹⁶ Elaviila momorapulula la hekako, la va Keriso ve apu hovea ka ha? Elaviila haivavailula la pai, la va Keriso ve maea hovea ka ha?

¹⁷ Ehovea elaviila oaria hareho pai haroapo herehere leilula, elaviila maea haroapo hovea. Elaviila oaria hareho la pai haroapo herehere laralula.

¹⁸ Israel haela ve aivau mai eavaila. Ere arura haha la hehe eapai herehere lalavahaea va ka ha?

¹⁹ Ara ve learia maeakilai ha? Hohao harihu va iele ha? aka hohao harihu aiarape la eapai va iele ha?

²⁰ Arave oharo maria: Ita lahua haela hehe leilula la eharu ere va ovehahu aiaralula, Aualari iele va ka. Ara ikivere ka e ovehahu momorapukive.

²¹ E va Aualari ve hekako i ovehahu ve la hekako ila hoa haroapo larive hovea ka — E Aualari ve eapai i ovehahu ve eapai ila hoa haroapo larive hovea ka.

²² Elaviila ikivere Aualari elaro ikiheaha leikive ha? Elaviila aheke, Aualari va mahuka ha?

²³ Eharu oaria ara va leivahaeakive, hovea, pupu ka, aka la eharu oaria la leivahaeakilava, veveke koara va ka. Eharu oaria leivahaeakive heroe, aka la eharu oaria hareho araro o iele lei veveke leivahaea va ka.

²⁴ Haela oaria elarelare ikivere eharu hiki kelava v'arekaea, aka haela ae ve ikivere okiharo kelavakive, heroe.

²⁵ Karikara ilaea leipe la eapai oaria le hiki, horahora va arekaea, arev'ila apevelavela kalaivahaelue.

²⁶ Ehovea meahaiapo i areve eharu oaria ila Amua ve eharu la.

²⁷ Ekalesia au laila haela ero eapai la itavakilava, e va pekakive ikivere la leikilava, ere ero aiaraki la eapai le hiki, iki horahora v'arekaea.

²⁸ Aka ero eapai aiaraki la haela ero maria la maeakilava, Ma va hohao harihu aiarape hehe eapai, Leia ka lalava?-?haealue, ehovea e i are ila hareho iki hahaeae leivahaeaki ave. Ehovea e i are ila hareho iki hahaeae leivahaeaki ave. Ehovea meahaiapo i areve eharu oaria ila Amua ve eharu la.

²⁹ A havahu ve ka, aka haela ae ve iki haeae leiki ave, ehovea arave oki haela ae ve ikikekela leve heheavakive?

³⁰ O iele, ara va ikiheroe meru v'ila la eapai herehere la larilava, ara va la eapai lei morapaeaki la hoa, haela araro la horova vil'a o heaha leve maeakive?

³¹ E va eapai aka ma la larilava, aka horova ae la leikilava, eharu oaria ve, Aualari ve rare morapaeaki.

³² Jew haela kai ita lahua haela, kai Aualari ve ekalesia haela ka hereavalue.

³³ Ara kara laria: ara va eharu oaria v'ila haela lei iki veveke leikilai, ehovea ara elare ikivere eharu haropa va ka, aka haela oaria ve, ehovea erero lei makukurikive.