1 Corinth 1 - Pupu Oharo Āre 1963 Genese 1970 Rute 1972

Ikiheroe i Thank you oharo ila

¹ Ara, Paul, Iesu Keriso ve aposetolo rare itavape, ehovea Aualari ve ikivere leipe: Sosthenes elave apoheari kara,

² Corinth apealula Aualari ve ekalesia haela oaria, Iesu Keriso hehe leivahaeape la haela, kai ita oaria haela kara, Iesu Keriso ve rare morapaealula, ereve Amua, elave Amua kara,

³ E va Oa Aualari i Amua Iesu Keriso ila ve ikiheroe i havila ila apeaki.

⁴ Ara va Aualari e v'ila morapaea hiki, ehovea e Iesu Keriso ve ikiheroe meru iele la koarape.

⁵ Ehovea eve oharo oaria i ikiore oaria are v'ila mekaka leivahaeape.

⁶ Hoveahovea Keriso ve oharo eve oki ve hihika leivahaeape.

⁷ Laelave, e va horova veveke hiki leivahaelula, kai Amua Iesu Keriso ve ekeki hoa la kariro.

⁸ Are ero aireaki hoa lei ehohoe leivahaeaki, elaviilave Amua Iesu Keriso ve hoa.

⁹ Aualari, areve Akore elave Amua Iesu Keriso ve ekalesia leivahaeape la Aualari va mai ehoe hiki.

Ekalesia ve hiru hiru lahua mai

¹⁰ Ma hoa ara ero here leive, apavara e, elaviilave Amua Iesu Keriso ve rare v'ila, e oaria oharo hoveahovea hukavaki; e va hiru hiru lahua lahua v'arekaea: e oaria hoa haroapo kai ikikekela haroapo hoveahovea leivahaeaki.

¹¹ Apavara e, Chloe ve la lalava haela uku araro mari kileape, e va elarelare hiru lahua lahua.

¹² Ara ero mari maeaeaive — haela mari arula, Ara Paul ve haela, uku va arula, Ara va Apollos ve, uku, Ara va Cephas ve, uku, Ara va Keriso ve.

¹³ Keriso va hiru lahua lahua hamureape ha? Ere Paul e v'ila satauro ve hape ha? E va Paul ve rare v'ila bapatiso leivahaeape ha?

¹⁴ Ara va Aualari morapaeaive ehovea ara haela oaria bapatiso au leila: Crispus i Gaius ila hiki.

¹⁵ A araro mari ari ave — ara elare rare ve bapatiso leipe.

¹⁶ Ara bapatiso leivahaeape haela aeva Stephanos i lalava haela oaria ila. Ara ore va ka, ara haela aeva bapatiso leipe la.

¹⁷ Ehovea Keriso araro kiparaeape iele ehovea bapatiso leiki horova ka, aka ehovea iroro oharo arive: ikiore ve oharo ka, Iesu ve satauro naoae naoae leiki ave.

Satauro ve aheke

¹⁸ Ehovea apihaeaki haela satauro ve iroro oharo iki haveva hovea kelavalula. Aka ovokake leilula haela arero Aualari ve aheke rare aro.

¹⁹ Ehovea hape oharo maria: Ara va ikiore haela ve iki‐ore hai ka leikilai, Ara va ereve iki‐ore oharo hukavavila haela ve oharo naoae naoae leikilai.

²⁰ Ikiore haela lahoa ha? Hohoa haeaki haela lahoa ha? Ma meahaiapo ve oharo hukavalula haela lahoa ha? Aualari ma meahaiapo ve ikiore ikihaveva hovea au leila ha?

²¹ Ehovea Aualari ve ikiore mai ma: Meahaiapo ve ikiore oki ve haela Aualari ve ikiore au koaraila — laelave Aualari iroro oharo ve ikihaveva v'ila ikikekela haela oaria lei makukuripe.

²² Ehovea Jew haela ihova haropalula; Greek haela ikiore la haropalula;

²³ Aka ela va Keriso satauro hape iroro oharo la arula — la va Jew haela ve hereavalula oharo, aeva Greek haela ve ikikekela ikihaveva oharo.

²⁴ Aka, iele itavavahaeape la haela, Jew i Greek haela ila hareho, Keriso va Aualari ve aheke i Aualari ve ikiore.

²⁵ Ehovea Aualari ve ikihaveva, are Haela ve ikiore ve akea ve. Aualari ve mahuka are va haela ve aheke ve akea ve.

²⁶ Apavara e, eve itavape la mai kelavaila! Aivau ve ikiore haela oaria au itavavahaeaila, aheke haela kara oaria ka, amua haela oaria ka.

²⁷ Aka Aualari meahaiapo ve ikihaveva hovea la eharu karape, ehovea ikiore haela heaorapakive — Meahaiapo ve mahuka eharu Are karape, ehovea amua haela heaorapakive.

²⁸ Meahaiapo ve ipi iele eharu, haela hahaure leilula la eharu, Aualari ikivere leivahaeape; aeva iele karia la eharu, ehovea iele ila la eharu naoae naoae leivahaeakive —

²⁹ Ehovea aivau eharu areve oropa ve pelaea leiki ave.

³⁰ E va Iesu Keriso ve oki ve areve eharu leivahaeape. Aualari arero elave ikiore i mai ehoe i hehe i ovokake leiki okiharo le leipe.

³¹ Overa hape la oharo hovea, Pelaea leikive ikivere la haela, veveke, are va Amua v'ila pelaea leikive.