TITUS 3 - Tohono O'odham

Mattsh hab wo wa junihid g s-apꞌekam

¹ Pt am wo ha ahgidad g wohochuddam mat has wo chum masmak. T wo s-ha wohog elidad g e-kokownalig ch am oidk hab wo e junihid g chehanig ch chum hekid wo e nahtokchid mat wo s-ap chikpanad ch hab wo junihid g s-apꞌekam.

² Am g ha ahgid mat pi wo pi kehg neneokad ab hedai i amjed ch wabshaba wo si s-ap e tahtkkad ch wo si s-hemajimak ab wehs ha wui.

³ Neh, heki ach hu wa hab masmakahim mo hegam mo pi ab hu wohochud g Jiosh. Pi ach wa ab hu kaiham g Jiosh ch pi haꞌichu amichud ch hab s-junimk g pi apꞌekam ch pi aꞌamdag ch s-chu hehgamk. Haꞌi o s-t-kehꞌid. Kuch ab epai s-ha kehꞌid.

⁴ K wabshaba g t-doꞌibiakam Jiosh si pihk e elid t-hekaj ch ia i e chehgi jewed dahm

^5-6 mat wo t-doꞌibia ab amjed g s-koꞌok t-namkidadag. Pi at hedai wo e nako mas wo e doꞌibia g hejel haꞌichu hab e-junikaj. T wabshaba g Jiosh ab i s-t-hoꞌigeꞌid k gam hu wako g pi ap t-chuꞌijig matt wo edagi g wechij doakag. Heg at hekaj ia jiwia g t-doꞌibiakam Jesus Christ jewed dahm k heg hekaj ab t-mah g Hekia S-apꞌekam Gewkdag. Heg o am t-eda ch ab t-mahkch hegai wechij doakag.

⁷ Jesus Christ o ab s-t-hoꞌigeꞌid ch am i t-apꞌech matt wo s-apꞌek am Jiosh tahgio. Kuch heg hekaj edgid ihda wechij doakag ch hab am wehmaj wo kihkad chum hekid am i dahm matt wo koi.

⁸ Do wohokam ihda mani haschu m-ahgid. Kupt chum hekid am wo ha ahgidad g wohochuddam. T hekaj wo e nuhkud mat wo s-wapagimak ch hab wo junihid g s-apꞌekam. Id at d wo i ha-wehmtadagk g hemajkam.

⁹ Kupt pi wo ha neꞌowinad hegam mo wabsh pehegi haꞌichu m-kaiam ch am chum m-pipꞌichud ab amjed g Tutuligo ha-chehanig ch chum ge e haschud ch hab kaij mo ab d ha amjedkam g si s-has hahaꞌichu.

^10-11 Gokko apt wo s-ha daꞌi hegam mat hedai wo chum aꞌai ha gaꞌagwulkai g wohochuddam. Hegam mat pi ab hu wo m-kaiha o pi apꞌe. T g pi ap ha-chuꞌijig am wo ha chehgi. Kumt wabsh wo ha dagito.

Mo id d si oidchkam ahgidadag

¹² Ia o ni-wehm dadha g Artemas ch Tychicus. Kunt idam am hema wo i kei mat am m-wui wo jiwia. Kupt am haha wo hih Nicopolis kihhim wui mapt am wo ni-wehmajk nant pi am wo dakad s-hehpichꞌed.

¹³ Kah ani mash am m-wehm da hegai Zenas mo d chehanig hudawogdam ch atsh am hebai wo ha mihshmdam g Apollos wehm. Kupt heꞌes wo i e nakog k am wo i ha wehmt mat pi haꞌichu wo pi edagi.

¹⁴ Bat wo wa chum masmak g wohochuddam mat hab waꞌap wo i ha wehmajk hegam mo hab masma tatchua g i wehmtadag.

¹⁵ Wehsijj o am i m-hoꞌigeꞌid idam t-wehm wohochuddam mo ia kih. Am g wehsijj i ha hoꞌigeꞌid g t-wehm wohochuddam amai. Jiosh at wo wa s-em-hoꞌigeꞌel.