PHILIPPIANS 1 - Tohono O'odham

¹ T-wepnag mam am kih Philippi t am: Am ant wo haꞌichu i em-oꞌohani ahni Paul g Timothy wehm. S-mahch am mach d piongaj g Jesus Christ namt pi ab i s-wohoch g haꞌichu t-ahga ab amjed k d Jiosh hemajkamga. Am ach s-ha ahgidamk g em-wanimeddam ch hegam mo am i ha wehmt mat ab wo i s-t-hoꞌigeꞌel.

² Ab o wa si s-em-hoꞌigeꞌid g t-ohg Jiosh g t-kownalig Jesus Christ wehm ch ab wo wa baꞌich i em-mahkad g i wehmtadag ch s-ap tahhadkam.

Mo id d Paul hoꞌigeꞌidahuna ha wehhejed

^3-4 Ab ani hoꞌigeꞌid g Jiosh ch si s-ap ni-tattam ch ni-hoꞌigeꞌidahun mani hekid i em-chechegitod.

⁵ Am am chikpanid g Jiosh ch haꞌichukaj am i ni-wehmaj gd hu i amjed mani wa am em-ahgid g s-kehg haꞌichu ahgaj g Jiosh.

⁶ Kuni heg hekaj s-mahch mat am wo himchudahid g Jiosh ihda doꞌibiadag em-wehhejed. Am at i shonwuich em-doakag ed k wo nahto mat hekid ia ep wo jiwia g Jesus Christ jewed dahm.

⁷ Bani wa masma hab em-elid nani pi chum hekid am i em-chegitod. Kum ahpim hab waꞌap chum hekid s-ni-chegito ch haꞌichukaj i ni-wehmt, chum hems hemu mani ia hu d lihso.

⁸ Ab o ni-mahkch g Jesus Christ g si geꞌe pihk elidadag em-hekaj. K g Jiosh s-mahch mo id d wohokam mani em-ahgid.

⁹ Kuni ab tahni mat hab wo em-juh mat baꞌich wo i geꞌeda g pihk em-elidadag ch haꞌichu em-mahchig ch haꞌichu em-amichudadag.

¹⁰ Mt heg amjed wo s-mahchk hegai mo s-apꞌe mamt hab wo junihid ch pi am hu wo edak g pi apꞌekam ch pi wo ha chuꞌijigk mat hekid ep wo jiwia g Jesus Christ.

¹¹ Heg o hab em-wua mamt am wo e chehgidch mam am hab wua g s-apꞌekam haꞌichu ch heg hekaj ab haꞌichuchud g Jiosh ch ab hehgchulid.

Mattsh d wo dodakamk am wehhejed g t-doꞌibiakam

¹² S-em-ahgidamk ani mo baꞌich i e gantan ihda s-kehg haꞌichu ahgaj g Jiosh heg hekaj mani ia kuhpi.

¹³ Wehsijj o s-mahch ia geꞌe kownal kih am ch an wehgaj mani d lihso heg waꞌi hekaj mani d piongaj g Jesus Christ.

¹⁴ K g t-wehm wohochuddam pi haꞌichu shaꞌi ehbid ch baꞌich i s-gewkam ia ahg g Jiosh haꞌichu ahga neidch mani wabsh s-ap ab nakog g ni-shoꞌigdag.

^15-17 Haꞌi o am hi chikpan ab si hejel e-tatchui amjed mat baꞌich wo i chum wahmud g haꞌichu pi ni-apꞌedag hemuch mani wa hu d lihso no pi s-ni-hehgamk ch wabsh ni-pipꞌichud. K wabshaba haꞌi ni-hekaj si pihk e elid ch ahgachug g Jiosh haꞌichu ahga no pi s-mahch mat g Jiosh am i ni-kei mant wo wohokamch g haꞌichu ahgaj.

¹⁸ K pi has chuꞌig. Ni wabsh s-ap ni-tahtk mo e ahgachug g Jiosh haꞌichu ahga, chum as haꞌi pi ap haꞌichu e-tatchui ab am wo ahgahi.

¹⁹ E am hoꞌigeꞌidahun am ni-wehhejed. K g Hekia S-apꞌekam Gewkdag i ni-wehmaj. Ni heg hekaj si s-ap ni-tahtk ch s-mahch mamt wo i ni-wuhshad.

²⁰ Tatchua ani mant chum hekid wehs hab wo juh mo haschu i ni-tatchuid g Christ pi haꞌichu ehbidch, wahm hemuch. Bant masma ab wo si has elidad wehs ni-ihbdagkaj, chum anis hems wo ni-muhkid heg hekaj.

²¹ Neh, pi o has d ahga g ni-doakag ni-wehhejed. Chum ani hi wa s-wehmjimk g Christ. K heg hekaj chum s-apꞌe mant hu wo i muh.

^22-23 Ntp wabshaba d wo doakamk ch baꞌich wo i chikpandad g Christ. Ni-wehhejed o hi wa baꞌich i s-apꞌe mant wo muhk k wo wehmajk g Christ.

²⁴ K wabshaba em-wehhejed hi baꞌich i s-apꞌe mant d wo doakamk.

²⁵ Ni heg hekaj s-mahch mant d wo doakamk ch hab am wo i em-wehmajk. Mt wo i geꞌehogat am e-wohochudadag ed ch hab wo si s-ap e tahtkkad.

²⁶ Am ant wo em-wehmajk. Kumt baꞌich ab wo i si has elidad g Christ ni-hekaj.

²⁷ Bamt masma wo himad g e-doakag mamt wo haꞌichuch g s-kehg haꞌichu ahga ab amjed g Christ. Nt haha wo kah mam am e hemakochudch ch s-ap ahgachug mat g hemajkam ab wo s-wohoch g s-kehg haꞌichu ahgaj g Jiosh, chum anis hems pi am hu ep wo em-nei.

²⁸ Pi g wo shaꞌi ha ehbidad hegam mo ab em-wui gegok. T heg amjed wo s-mahchk mat ab wo bei g s-koꞌok e-namkidadag. Mt ahpim ab wo bei g e-doꞌibiadag ab amjed g Jiosh.

²⁹ Do Jiosh hab elida mamt pi ab wabsh wo s-wohochudad g Christ ch wabshaba am wehhejed ep wo e shoꞌigchudad.

³⁰ Ab amt wui wo gegokkad g pi apꞌekam hab masma mam am wa neid mani hab ni-wua ch hemu kah mani hab wabsh kia ni-wua.