MATTHEW 1 - Tohono O'odham

Mash hedai d si shohshonaj g Jesus

¹ Ia atsh mahsi g Jesus Christ jewed dahm k ab d amjedkamaj hegai t‑kekelibad ha‑kownalig mash hab chehgig David. Kush g Davidbad ab d amjedkamaj hegai mash d t‑shohshon ahchim Tutuligo ch hab chehgig Abraham. In ant wo oꞌoha g ha‑chechgig hegam mash d Jesus Christ shohshonbad.

² Abraham atsh wa an alidt g Isaac. Tsh g Isaac an alidt g Jacob. Tsh g Jacob an ha aꞌalidt hegam Judah.

³ Tsh g Judah an ha aꞌalidt g Perez ch Zerah heg ab mash d Tamar. Tsh g Perez an alidt g Hezron. Tsh g Hezron an alidt g Ram.

⁴ Tsh g Ram an alidt g Amminadab. Tsh g Amminadab an alidt g Nahshon. Tsh g Nahshon an alidt g Salmon.

⁵ Tsh g Salmon an alidt g Boaz heg ab mash d Rahab. Tsh g Boaz an alidt g Obed heg ab mash d Ruth. Tsh Obed an alidt g Jesse.

⁶ Tsh g Jesse an alidt g David. David atsh an alidt g Solomon heg ab mash d chum hohnigaj g Uriah.

⁷ Tsh g Solomon an alidt g Rehoboam. Tsh g Rehoboam an alidt g Abijah. Tsh g Abijah an alidt g Asa.

⁸ Tsh g Asa an alidt g Jehoshaphat. Tsh g Jehoshaphat an alidt g Joram. Kush ihda Joram d shonaj g Uzziah.

⁹ Tsh g Uzziah an alidt g Jodam. Tsh g Jodam an alidt g Ahaz. Tsh g Ahaz an alidt g Hezekiah.

¹⁰ Tsh g Hezekiah an alidt g Manassah. Tsh g Manassah an alidt g Amos. Tsh g Amos an alidt g Josiah.

¹¹ Kush ihda Josiah d ha‑shon hegam Jeconiah matsh eda gam hu hab i e juh g t‑shohshonbad Babylon kihhim wui.

¹² Jeconiah atsh an hahawa alidt g Shealtiel. Tsh g Shealtiel an alidt g Zerubbabel.

¹³ Tsh g Zerubbabel an alidt g Abiud. Tsh g Abiud an alidt g Eliakim. Tsh g Eliakim an alidt g Azol.

¹⁴ Tsh g Azol an alidt g Zadok. Tsh g Zadok an alidt g Akim. Tsh g Akim an alidt g Eliud.

¹⁵ Tsh g Eliud an alidt g Eliazar. Tsh g Eliazar an alidt g Matthan. Tsh g Matthan an alidt g Jacob.

¹⁶ Tsh g Jacob an alidt g Joseph. Kush ihda Joseph d kunaj hegai mo d Jesus jeꞌe ch hab chehgig Mary. K ihda Jesus hab e aꞌaga Christ.

¹⁷ Pegih, nt gamai giꞌik an oꞌoha g ha‑chechgig hegam mo d e‑oꞌogbad am i amjed mash eda am oimmed g Abrahambad ch am hugkam mash eda am oimmed g Davidbad. Kunt hab waꞌap gamai giꞌik an oꞌoha g ha‑chechgig hegam mo d e‑oꞌogbad heg i amjed ch gam hu hugkam matsh eda gam hu hab i e juh g t‑shohshon Babylon wui. Kunt gamai giꞌik an oꞌoha g ha‑chechgig hegam mo d e‑oꞌogbad heg i amjed ch gam hu hugkam matsh ab mahsi hegai mo hab e aꞌaga Jiosh si Kehsha (Christ).

Matsh mahsi g Jesus

¹⁸ Ia ant wo oꞌoha matsh has e juh matsh eda mahsi g Jesus Christ. Am amtsh i apꞌech matsh idam Joseph ch Mary wo e hohont. Tsh am hahawa s‑e mai mat g ali wo bei.

¹⁹ K hab chuꞌig g chehanig mat chum pi wo ha bei g cheoj matp hab wo wa e juh. Kush g Joseph am wabsh si s‑ap oid g chehanig ch hekaj hab e elid mat pi wo be k wabshaba pi hedai wo ha ahgi. T hab pi wo si e el g Mary.

²⁰ Sh am oidahim ihda g Joseph. Kutsh am haha wabsh ab wui i e chehgi g anghil am chehchkij ed k hab kaij, “Joseph map ab d Davidbad amjedkam, am g wabsh s‑ap e tahtk k wo bei g Mary mat d wo m‑wehm kihkamk. Hekia S‑apꞌekam Gewkdag at hab juh ihda ali mat g Mary wo bei.

²¹ Kut d wo cheojk. Kupt hab wo chehch Jesus mo hab d ahga ha‑Doꞌibiakam. Bat wo chehgigk nat pi wo ha doꞌibia g e‑hemajkamga ab ha‑chuꞌijig amjed.” Neh, bash kaij g anghil am Joseph wui.

²² Wehs atsh wa hab e juh ihda hab masma mash wa hab masma heki hu hab kaij g Jiosh. Kelibad Jiosh haꞌichu i tashogiddam atki an oꞌoha mash wa hab kaij:

²³ Hema g si s‑ap chehia at wo bei g cheoj ali pi koi ab hu i miabidk g cheoj. Kumt hab wo aꞌagad Manuel mo hab d ahga Jiosh o t‑Wehmaj. Isaiah 7:14

²⁴ Kutsh hekid am i nea g Joseph k atsh am ha hekaj hab e juh mash has i kaij g anghil ab wui matsh an bei g Mary.

²⁵ Sh wabshaba pi am hu hab masma e wehm kih mo g e wehm kihkam am hugkam mat hekid ip bei g ali. Tsh g Joseph hab hahawa chehch Jesus.