HEBREWS 3 - Tohono O'odham

Mash baꞌich i si s‑has d haꞌichu g Jesus mo g Mosesbad

¹ Pegih, ni‑wehm wohochuddam, ab at i em‑gawulkai g Jiosh gahi wuhshanim g e‑alidag Jesus. Heg o d Jiosh si Kehsha ch d uhgchu t‑pahlig. Kumt wo oidahid mo has chuꞌig.

² Jiosh atsh heki hu am i kei g Mosesbad ha dahm g e‑hemajkamga. Kush heg s‑ap am hab junihim g e‑chikpan. Pegih, sh g Jesus hab waꞌap s‑ap am hab junihim g e‑chikpan am Jiosh wehhejed.

^3-4 Kutt wabshaba baꞌich ab wo i si has elidad g Jesus mach g Mosesbad no pi d Jiosh ch wehs haꞌichu nahto.

⁵ Mosesbad ash s‑ap am hab junihim g e‑chikpan am ha shahgid g Jiosh hemajkamga ch wabshaba d wabsh Jiosh pionag. Tsh g Jiosh am i kei matsh wo haꞌichu aꞌaga wehhejed matsh gam hu baꞌich hahawa s‑ap wo i e tashogit.

⁶ Kush eda g Jesus d Jiosh alidag ch d si kehshaj matsh wehs am wo ha dahmkad g hemajkamgaj. Kuch ahchim d hemajkamgaj mattp pi wo dagito g t‑wohochudadag k wabsh s‑ap t‑tahtkk ch wo nenida mat hab wo t‑juni mo has i kaij.

Mamtsh pi wo pi chechkaidagk

⁷ Neh, bash masma hab chuꞌig am t‑wehhejed mash wa hab chuꞌig am ha wehhejed g t‑shohshonbad ahchim Tutuligo. Hegam ha wui ash hab kaij g Hekia S‑apꞌekam Gewkdag: Ab o em‑waid g Jiosh hab masma mo wa ab ha waid g em‑geꞌegedga.

⁸ Hegam o pi chechkaidag Kumt pi hab wo chum masmak. Jiosh o wa am ha wehhejed apꞌechudch g jewed ch ab ha waid mat s‑ap am wo dadhaiwua heg eda. T wabshaba wa pi am hu i wahp

⁹ k wabsh pipꞌichud ch am dadha gam hu jegko am wa chum neidch mo haschu am hab ha junid giꞌikko wehst‑mahm (40) aꞌahid ab.

¹⁰ T g Jiosh pi am hu i ha wahpki heg oidam k s‑ha kehꞌid k hab kaij: Chum o hekid pi ap chegito idam hemajkam ch pi mai g ni‑himdag.

¹¹ Kunt hab si i ni‑ah mat pi hekid am hu wo i wahp k pi hekid wo s‑ap dadhaiwua idam geꞌeged mo hab masma k wabshaba ab wo bei g s‑koꞌok namkidadag. Psalm 95:7-11

¹² Neh, tsh wa woho hab e juh g Jiosh neꞌoki am ha wehhejed. Kumt heg hekaj wo s‑e nenꞌeidad mamt pi hab masma wo pi chechkaidagk. Jiosh o d doakam ch woho gam hu hab wo i em‑juh mamtp pi ab hu wo kaihamad.

¹³ Ab o t‑waid g Jiosh hemu ch wabshaba pi chum hekid ab wo t‑waidad. Mt wo e iattogi g pi apꞌekamkaj mamtp pi ab hu wo kaihamad g Jiosh. Ab g aꞌai wo i e gewkemhunad mamt ab wo kaihamad.

¹⁴ Dach s‑wohom Christ hemajkamga mattp an wo si uꞌukchid g t‑wohochudadag wehs t‑doakag oidam.

¹⁵ Mt heg hekaj wo s‑chegitok ihda mani am em‑ahgid ch pi wo pi chechkaidagk hab masma mash wa hegam mash pi ab hu wohog elid g Jiosh.

¹⁶ Jiosh atsh wa am ha doꞌibia ab ha amjed g Egypt t am hemajkam am gahi wuhshanim g Mosesbad. Kush eda hahawa pi chechkaidag.

^17-18 Sh g Jiosh s‑ha kehꞌid ch hab kaij matsh pi wo ha hiwigi mas am wo i wahp amai mash hebai am chum apꞌechudch ha wehhejed k hoꞌip wehs koi hegam geꞌeged mash pi ab hu wohog elid. Kush heg hekaj am oiopo tohono jewed ch ed giꞌikko wehst‑mahm (40) aꞌahid ab.

¹⁹ Neh, id o am t‑chehgidch matki heg hekaj pi am hu ha wahpki g Jiosh heg eda jewed mash pi ab hu wohochud.