OVAHEBERI 8 - Ombibeli Iyapuki

Omupristeli omukulunhu kolulyo laKalunga

¹ Ndelenee oshinima shinene shi dule ikwao eshi hatu shi popi paife osheshi: Otu nomupristeli omukulunhu e li ngaha, e li omutumba kolulyo lolukalwapangelo lOmufimanekwa meulu,

² a kale omuyakuli woinima iyapuki nouyapukielela metwali lashili, la tungwa kOmwene, hakomunhu.

³ Osheshi keshe tuu omupristeli omukulunhu ta tulilwa po okuyamba eeshali nomayambo, onghee hano naye yo e nokukala e na sha shokuyamba.

⁴ Ngeno ye okwa li kombada yedu, ngeno ke fi omupristeli, osheshi ava hava yandje eeshali panghedi yomhango opo ve li,

⁵ ovo hava yakula mwaashi shi li efano nomudidimbe woikwaulu, ngaashi sha hololelwa Moses, eshi a li e nokudika etwalingulu, a lombwelwa kuKalunga: “Tala nawa, u longe oinima aishe pafano eli wa ulikilwa komhunda.”

Ehangano lipe la dikilwa komaudaneko mawa

⁶ Ndelenee paife Kristus a pewa oshilongayakulo shiwa shi dule shinya, ngaashi a ninga Omupokati wehangano liwa li dule linya, la dikilwa komaudaneko mawa e dule enya.

⁷ Osheshi linya lotete ngeno ola li la wana, ngeno likwao inali pumbiwa.

⁸ Osheshi ote va lombwele nokutanguna: “Taleni, otape uya omafiku, Omwene osho ta ti, Ame ohandi dikile eumbo laIsrael neumbo laJuda ehangano lipe,

⁹ hehangano la fa olo nde li ningila ooxo efiku nde va kwata kokwooko nde va kufa mo medu laEgipiti, osheshi vo inava kala mehangano lange, naame yo onde va efa po, Omwene osho ta ti.

¹⁰ Osheshi ehangano olo handi ke li ninga neumbo laIsrael omafiku oo ngeenge a pita po, oleli, Omwene osho ta ti: Omhango yange ohandi ke i tula mo momadiladilo avo nohandi ke i shangela momitima davo, nosho ngaha ohandi ka kala Kalunga kavo, ovo notava ka ninga oshiwana shange.

¹¹ Ndele itapa ka kala vali umwe ta longo mukwao ile omumwaxe ndele ta ti: ‘Shiiva Omwene,’ osheshi aveshe, ounona novakulunhu vomuvo otava ka shiiva nge.

¹² Ohandi ke va fila onghenda omolwomanyonauno avo, nomatauluko avo itandi ke a dimbulukwa vali.”

¹³ Hano eshi ta ti: ehangano lipe, okwa shiivifa nokutya, linya lotete ola kulupa; ndele eshi sha kulupa nosha kulupilila, osha nyika okuxula po.