OVAHEBERI 2 - Ombibeli Iyapuki

¹ Onghee hano otu nokudiinina edi twe di uda tuhe di pitilile.

² Osheshi ondjovo ei oya popififwa ovaengeli eshi ya li ya pama, netauluko keshe nokuhadulika keshe okwa mona ehandukilo la yuka,

³ hano fye ohatu i ngahelipi onhapo, ngeenge hatu dini exupifo linene li fike apa, la udifwa tete kOmwene ndele la pamekwa kwaava ve li uda, ndele tave li fikifa kufye,

⁴ eshi Kalunga yo a hepaulula pamwe navo nomadidiliko noikumwifalonga noilonganghono i lili neeshali dOmhepo Iyapuki pahalo laye.

Aishe oi li mepangelo laKristus

⁵ Osheshi ounyuni ou tau uya, ou hatu u tongo, ine u tula mepangelo lovaengeli.

⁶ Ndele umwe a hepaulula monhele imwe ndele ta ti: “Omunhu omushike, eshi ho mu dimbulukwa, nomona womunhu eshi ho mu file oshisho?

⁷ Okafimbo kaxupi we mu ninipikile, e dulike kovaengeli, nowe mu dika oshinge nefimano ndele we mu pa epangelo kombada yoilonga yomake oye.

⁸ Oinima aishe owe i tula koshi yeemhadi daye.” Osheshi eshi e mu tulila aishe mepangelo laye, ina fiya po nande shimwe inashi findilwa koshi yaye. Ndelenee paife katu wete natango nokutya, aishe oya findilwa mo.

⁹ Ndelenee ou a ninipikilwa okafimbo kanini e dulike kovaengeli, Jesus, otu mu wete a dikwa oshinge nefimano omolwouyehame wokufya, opo a lole efyo ponhele yaaveshe okefilonghenda laKalunga.

A finda efyo

¹⁰ Osheshi sha wapalela ou, aishe i li omolwaye naaishe ya dja muye, mOmwene wexupifo lavo, e mu lenge mouyehame, a kale a wana nokutwala ovana vahapu moshinge.

¹¹ Osheshi ou ta yapula naava va yapulwa, aveshe ova dja muumwe, onghee ita fi ohoni oku va ifana ovamwaxe,

¹² eshi ta ti: “Edina loye onda hala oku li shiivifila vakwetu nomokati keongalo ohandi ku imbile ehambelelo.”

¹³ Navali: “Elineekelo lange ohandi li tula muye,” nadimwe vali: “Tala, aame nounona ava Kalunga e va pa nge.”

¹⁴ Hano ngaashi ounona va ninga ombelela nohonde, naye yo okwa kwatafana navo opanghedi tuu oyo imwe, opo a hanaune po nefyo laye ou a kala e nepangelo lefyo nokutya, Satana,

¹⁵ ye opo a mangulule aveshe ava va li moupika woumbada wefyo mokukalamwenyo kwavo akushe.

¹⁶ Osheshi havaengeli te va tambula, ndelenee ta tambula oludalo laAbraham.

¹⁷ Onghee hano Ye okwa li e nokufaafana novamwaxe moinima aishe, opo a ninge omupristeli omukulunhu omunamutimanghenda nomudiinini moilonga yaye yopuKalunga, Ye a longele ovanhu edimepo lomatimba.

¹⁸ Osheshi Oye mwene, eshi a yehamekwa nokwa hongaulwa, ota dulu okukwafa ava tava hongaulwa.