OMAPSALOME 95 - Ombibeli Iyapuki

Ekumaido okupandula Kalunga nokudulika kuye

¹ Ileni, tu kuwilileni Omwene, tu nyakukilweni emanya lexupifo letu!

² Tu holokeni koshipala shaye nokupandula, fye tu mu tanheleni nomaimbilo ehambelelo.

³ Osheshi Omwene Oye Kalunga kanene nohamba inene kombada yookalunga aveshe.

⁴ Oye tuu ou e kwete meke laye eembwili domeni ledu, neexulo deemhunda odaye.

⁵ Nefuta olaye, osheshi Oye e li shita, nedu likukutu olo la mewa keke laye.

⁶ Ileni, tu linyongameneni, fye tu liwitike pedu, Omwene Omushiti wetu tu mu twileni eengolo!

⁷ Osheshi Oye Kalunga ketu, ndele fye oshiwana shoufita waye, needi domeke laye. Akutu ngeno nena nye mu ude ondaka yaye:

⁸ “Inamu kukutika omitima deni, ngaashi sha ningilwe muMeriba, ngaashi efiku linya kuMassa mofuka,

⁹ omo ooxo va shindile nge, nova yelekele nge, nande va mona oilonga yange.

¹⁰ Omido omilongo ine onda li nda tondifwa kepupi olo, opo nda tya: ‘Oshiwana eshi shi nomitima da puka; ndele vo inava hala okushiiva eendjila dange.’

¹¹ Opo nee mehandu lange onda anene nda tya: ‘Vo itava fiki metulumuko lange!’ ”