OMAPSALOME 89 - Ombibeli Iyapuki

Kalunga ta indilwa a wanife eshi a udanekela David

Ounongoimbilo laEtan Omuesrahi.

¹ Omauwanghenda Omwene onda hala oku a imba alushe, noudiinini woye ndi u hepaululile ovatekulululwa nokanya kange.

² Osheshi Ove wa tya: “Ouwanghenda otau ka kala wa dikwa po fiyo alushe meulu, oudiinini woye wa pamekwa.

³ Ame nda dika ehangano nomuhoololwa wange, omupiya wange David, nde mu anenene:

⁴ ‘Oludalo loye onda hala oku li pameka li kale po fiyo alushe, nolukalwapangelo loye ohandi li pangelele omaludalo aeshe okomesho.’ ” Sela

⁵ Ndele omaulu otaa tange oikumwifalonga yoye, Omwene, osho yo oudiinini woye meongalo lovayapuki.

⁶ Ile olyelye womoule meulu e fike pOmwene, movana ovamati vaKalunga elipipo a fa Omwene?

⁷ A fe Kalunga ou ha tilika moshiongalele shovayapuki, noku neshushu mwaaveshe ava hava kala puye.

⁸ Akutu Omwene, Kalunga keengudu dovakwaita, olyelye ngaashi Ove? Oove omunaenghono, akutu Omwene, oudiinini woye otau ku dingilile apeshe.

⁹ Ove to pangele etukuluko lomeva efuta; omakufikufi alo ngeenge tae litumbu, Ove to a lotifa.

¹⁰ Ove wa tyuvaula Rahab a fa a tetwatetwa, okwooko kwoye kweenghono we ku halakanififa ovatondi voye.

¹¹ Eulu oloye, nedu oloye, ongonga yedu nouyadi walo, Oove we li dika.

¹² Oumbangalanhu noumbuwanhu, Oove we i shita. Tabor naHermon nadi kuwilile edina loye.

¹³ Okwooko kwoye oku neenghono, neke loye ola pama, nolulyo loye ola yeluka.

¹⁴ Ouyuki neyukifo, oyo efina lolukalwapangelo loye. Ouwanghenda noudiinini otau tetekelele oshipala shoye.

¹⁵ Oshiwana shi nelao, osheshi shi udite oshivilohafo, eshi hashi ende mouyelele woshipala shoye, Omwene.

¹⁶ Efiku alishe otava tanhele edina loye, molwouyuki woye otava nenepekwa.

¹⁷ Osheshi Oove etumbalo lavo nepameko lavo, molwoku tu hokwa kwoye oluvinga letu ola yeluka pombada;

¹⁸ osheshi oikelelifo yetu, oyOmwene, nohamba yetu, oyo Omuyapuki waIsrael.

¹⁹ Shito owa popifile ovayuki voye memoniko, wa tile: “Onda yandja eenghono komuladi e mu kwafe, nde mu tumbila elenga, eli nda hoolola movanhu.

²⁰ Onda mona David, omupiya wange, nde mu vaeka nomaadi ange mayapuki,

²¹ opo eke lange alushe li kale kuye, nokwooko kwange ku mu pameke.

²² Kape nomunaita te mu ende koshi, nombudi, i mu lungamene.

²³ Ndelenee ovashindanhu vaye onda hala oku va shataula po, naava tave mu tondo, ndi va pundaulile poshi.

²⁴ Oudiinini wange nouwanghenda wange tau kala pamwe naye, nomedina lange oluvinga laye nali yeluke pombada.

²⁵ Onda hala okudulikifa omeva efuta keke laye, Ame ndi tule olulyo laye kombada yomilonga.

²⁶ Oye ou ta ka ifana nge: ‘Oove Tate yange, Oove Kalunga kange, emanya lexupifo lange.’

²⁷ Onghee hano naame yo onda hala ndi mu ninge oshiveli nomukulunhu mokati keehamba dokombada yedu.

²⁸ Alushe onda hala, ndi mu diininine ouwanghenda wange, nehangano letu naye nali mu pamene.

²⁹ Noludalo laye onda hala oku li pameka fiyo alushe, osho yo olukalwapangelo laye nali kale, ngaashi eulu li li po.

³⁰ Ovana vaye ovamati, ngeenge tava efa omhango yange ndele itava kala meenghedi dange,

³¹ ndele tava nyono eemhangela dange, ndele itava diinine oipango yange,

³² opo nee eliteeko lavo, Ame ohandi li va alulile noshokoto noku va dengela owii wavo;

³³ ndelenee ouwanghenda wange, owo inandi hala, ndi u va nyekulule, noudiinini wange itandi u likale.

³⁴ Inandi hala, ndi xutule ehangano letu naavo, naashi nda tongele nomilungu dange, ihandi shi tongolola.

³⁵ Lumwe aluke onda li nda ana kouyapuki wange: oshili, naDavid itandi ke mu fufya nande.

³⁶ Oludalo laye nali kale po alushe, nolukalwapangelo laye li faafane netango koshipala shange;

³⁷ olo li kale po alushe ngaashi ohani; ondobwedi ei yomoilemo oyoshili.” Sela

³⁸ Ndelenee nande pa li ngaha, Ove we tu ekelashi nowe tu taataela kwi, nomuvaekwa woye to mu udile onya;

³⁹ owa teyaula po ehangano leni nomupiya woye, oshishani shaye shokomutwe we shi kufa etumbalo, nowe shi kupaulashi mondwi yedu.

⁴⁰ Omakuma aye aeshe neehote daye, owe a ngumauna po, owe a shitukifa oikulukuma.

⁴¹ Aveshe ava tava ende nondjila ei, otave mu vakaavaka, nokwa ninga oshiyolifa kovashiinda vaye.

⁴² Eke lokolulyo lovafininiki vaye owe li pa efindano, wa hafifa ovatondi vaye aveshe.

⁴³ Osho vali omukonda waye weememo owe u shunifa monima molwoodi, Ove ino mu pamekela mo ofika.

⁴⁴ Oshinge shaye owe shi dima po, nolukalwa laye owe li undwila poshi.

⁴⁵ Omafiku ounyasha waye owe a xupipika, owe mu tuvika nelengwa nodino. Sela

⁴⁶ Fiyo onaini hano, Omwene, wa hala okuhondama ngaha, nehandu loye tali xwama fiyo onaini, la fa omundilo?

⁴⁷ Omwene, dimbulukwa omafiku ange nhumba maxupi, novanhu aveshe, nhumba we va shita ihava kalele kuxula po.

⁴⁸ Openi mbela pe na ou, ta kala nomwenyo ndele ita mono efyo, ye a xupife omwenyo waye mepangelo loshovafi? Sela

⁴⁹ Omwene, omaudaneko oye ouwanghenda, aa wa anena nale David moudiinini woye, oku li nee peni?

⁵⁰ Omwene, dimbulukwa odino yovapiya voye, ame eshi ndi li po handi humbata meni lange omasheko oiwana yoilongo, apa i fike.

⁵¹ Oyaa, ovatondi voye, Omwene, tava sheke nao, omanha omuvaekwa woye otave a sheke nao.

⁵² Omwene na fimanekwe fiyo alushe! Amen, heeno, Amen.