OMAPSALOME 76 - Ombibeli Iyapuki

Kalunga Oye omutokoli nomuxupifi

Epsalome laAsaf. Eimbilo la pewa enyakwa lolwiimbo oku li shika mouxumbafeta.

¹ Kalunga okwa shiivika apeshe muJuda, edina laye linene muIsrael.

² Osheshi ondjuwo yaye oya tungwa muSalem, ongulu yaye okukala mo komhunda yaSion.

³ Oko tuu oko a teyaula oikutiluvadi yomauta, noshikelelifo, neongamukonda noiti yavo aishe. Sela

⁴ Ove wa dja moshinge nomeenghonopangelo keemhunda doihakanwafindano.

⁵ Ovakwaita ovaladi ova nyekwa oiti, ova li va kendjengelwa keemhofi didjuu, novaladi aveshe ova fya oungonywe momaoko avo.

⁶ Eingido leaneko loye ola kambukifa omatemba neenghambe, Kalunga kaJakob.

⁷ Heeno, Oove omutilifi, olyelye ta dulu okukala koshipala shoye fiku to handuka?

⁸ Keulu taku di eshiivifo letokolo loye, opo edu la haluka la kanghwa,

⁹ eshi Kalunga a fikama okutokola, a xupife ovafininikwa aveshe kombada yedu. Sela

¹⁰ Osheshi onyanya yovanhu otai ku shitukifile efimaneko, poxuuninwa eshi to lidike omitemo dehandu.

¹¹ Tongeni omaudaneko nye mu a wanifile Omwene, Kalunga keni! Aveshe ovo tave mu kundukile, ove nokweetela onakutilika omaano,

¹² Oye tuu, ta xutula outuwalali wovakwananghali, ndele ta tilifa eehamba dokombada yedu.