OMAPSALOME 65 - Ombibeli Iyapuki

Epandulo molwouwa waKalunga

Epsalome, eimbilo laDavid, la pewa enyakwa lolwiimbo.

¹ Oove wa wana okufimanekwa, Ove, Kalunga muSion, Oove u nokuwanifilwa omaudaneko;

² Oove, Omuudi womailikano, ombelela aishe i nokuuya kwoove.

³ Owii wange omuhapu unene; ndelenee Ove to tu dimine po omanyono etu.

⁴ Omunelao ou, we mu hoolola, ndele oto itavele a ehene kwoove, ye a kale momikala doye, opo fye tu palulwe kouwa weumbo loye, mouyapuki wotembeli yoye.

⁵ Oove ho tu nyamukula noikumwifa mouyuki, Kalunga kexupifo letu, Oove eameno lomaxulilo aeshe edu nolomafuta okokulekule,

⁶ ou, ho diki eemhunda meenghono doye, ndele wa mangwa nekwamo leenghono,

⁷ noho lotifa engungumo lomafuta, engungumo lomakufikufi ao, nomakolokoto ovanhu,

⁸ opo nee ovanhu vokomaxulilo edu, vo va tile oidimbulukifo yoye; noilongo ei ya shiya ko koushilo nokoutokelo, to i yadifa ehafo.

⁹ Ove wa yavelela edu, to li tutike, ndele oto li ningi la punapala unene, nomulonga waKalunga u yadi omeva; oto va menifile oilya; osheshi osho ngaha to longekida edu.

¹⁰ Oto tutike oimhungu yalo, noto hendifa eehenda dalo, oto li pupaleke noihomo yodula, nomumeno walo oto u nangeke noupuna.

¹¹ Omudo oto u wapeke nouwa woye, noshikoti shoye oto shi shishifile omaadi.

¹² Nomwiidi womaulifilo, outalala mboomboo, noikulundudu ya djala enyakuko.

¹³ Oyana nomilola oya djala omaufita eedi, nomalufilu okwe lituvika noilya; ope nenyakuko nokwiimba.