OMAPSALOME 58 - Ombibeli Iyapuki

Omutokoli wovatokoli

Eimbilo laDavid, la pewa enyakwa lolwiimbo oku li imba mongovela yEpsalome: ‘Ino nyonauna po’.

¹ Ookalunga nye, otamu popi tuu oshili? Ovana vovanhu otamu va tokola tuu pauyuki?

² Ahowe, momitima deni otamu dutile mo owii, moshilongo otamu tandavelifa enyeko pashiyelekifo shoumbudi womake eni.

³ Ovahenakalunga ovo ovaefi, nghee va dalwa; novanaipupulu ovapuki, nghee va dja medimo laina.

⁴ Meni lavo ove noudiyo weyoka, ngaashi efu efitamatwi, eli tali lipwililikile mokuhauda ko,

⁵ noitali deuka kondaka yomudeuli, omwiifani omunongo wao.

⁶ Kalunga, teyaula omayoo momakanya avo, omaxuwambwa eenghoshona a teyaula po!

⁷ Nava pwiinine po, ngaashi omeva aa taa ningine medu. Ngeenge ta shoneke oikuti yaye, nai kale ya fa ihe nonhele.

⁸ Ngaashi onghofya tai fi omutenya, osho naye na nyonaukile po, ngaashi edimo lomukainhu, eli la dja po, noinali mona etango.

⁹ Eembiya deni, fimbo dihe udite omundjene womundilo womakiya, ote di kombo po noshikungulu shaye, edi ditalala naadi da xwama.

¹⁰ Omuyuki eshi a mona ehandukilo lavo, otashi mu hafifa, neemhadi daye ote di koshele mohonde yovahenakalunga.

¹¹ Ndele taku tiwa: “Heeno, oshili, omuyuki ota mono oshiimati nokuli; heeno, oku na Kalunga, ou ha tokola kombada yedu.”