OMAPSALOME 48 - Ombibeli Iyapuki

Sion oshilando shohamba inene

Epsalme la imbwa kOvakora.

¹ Omwene Oye omunene, oku nokufimanekwa shili moshilando shaKalunga ketu, omhunda yaye iyapuki.

² Moumbangalanhu omhunda yaSion otai litumbu pombada mewapalo, oyo ehafo ledu alishe, oyo oshilando shohamba inene.

³ Kalunga okwe limonikifa meengulu dasho, nokutya Oye ohote ya pama.

⁴ Tala hano, eehamba da li de lipaka kumwe, da ile oku i totela.

⁵ Ndele eshi de i mona, da kumwa nokuhaluka ndele tadi i onhapo.

⁶ Do oda li po da kakama, di kwetiwe ketilo, ngaashi omufimba ta fetwa.

⁷ Eeskepa dokuTarsis, Ove to di ninginifa nomhepo yokoushilo.

⁸ Hano ngaashi twa li twe shi uda, paife osho otwe shi mona yo moshilando shOmwene weengudu dovakwaita, moshilando shaKalunga ketu, nokutya Kalunga ote shi pameke fiyo alushe. Sela

⁹ Kalunga, ouwanghenda woye ohatu u dimbulukwa motembeli yoye.

¹⁰ Kalunga, ngaashi shi li edina loye, osho oshi li yo efimano loye: otali udika fiyo okeexulo dedu: eke loye lokolulyo oli yadi ouyuki.

¹¹ Omhunda yaSion otai shi hafele, noukadona vaJuda tava nyakukilwa omatokolo oye.

¹² Dingilileni Sion, shi ningileni okalovolovo, nye mu vale eengulu dasho.

¹³ Konakoneni eehote dasho, mokweenda kweni didilikeni omapopilongulu asho, opo mu shiive oku shi hepaululila ovatekulu veni,

¹⁴ nokutya: “Kalunga ou, Oye tuu Kalunga ketu alushe fiyo alushe; note tu endifa fiyo omokufya.”