OMAPSALOME 47 - Ombibeli Iyapuki

Omwene Oye ohamba yoiwana aishe

Epsalme lOvakora, la pewa enyakwa lolwiimbo.

¹ Oiwana yoilongo nye amushe, panduleni nomake! Nyakukilweni Kalunga nondaka inene.

² Osheshi Omwene omunene wOkombadambada, a tilika, ohamba inene kombada yedu alishe.

³ Oilongo okwe i findila mepangelo letu, omaludi nomaludi okwe a tula koshi yeemhadi detu.

⁴ Oye e tu hoololela ombinga yefyuululo letu, oshifimanekwalongo shaJakob, ou a hokiwa kuye. Sela

⁵ Kalunga okwa londa kolukalwapangelo laye nokunyakukilwa, Omwene a ya koshipundi shaye mendudumo lomanghuma.

⁶ Imbileni Kalunga ehambelelo, imbeni ehambelelo. Imbileni ohamba yetu ehambelelo, imbeni ehambelelo.

⁷ Osheshi Kalunga Oye ohamba yedu alishe: onghee hano mu imbileni eimbilo lehambelelo.

⁸ Kalunga Oye ohamba yoiwana, Kalunga e li omutumba kolukalwapangelo laye liyapuki.

⁹ Eedalekele doilongo oda ongala puye, da ninga oshiwana shaKalunga kaAbraham. Osheshi oikelelifo yedu oyaKalunga, Oye a fimana pombada.