OMAPSALOME 45 - Ombibeli Iyapuki

Oshivilo shehombolo lohamba

Ounongoimbilo wOvakora, wa pewa enyakwa lolwiimbo; mongovela yeimbilo eli: ‘Eenhemo domado’, eimbilohole.

¹ Omutima wange ou yadi ndoondoo, tau xunga eendjovo diwa. Eimbilo lange ohandi li yapulile ohamba. Elaka lange ola fopena yehamushanga ha endelele.

² Ove, owa wapala u dule ovakwadu aveshe mouwa; ewapalonyenye ola tilwa komilungu doye; osho Kalunga e ku nangeka noupuna fiyo alushe.

³ Omuladi ove, mangela omukonda woye moshiya shoye; limanga noshinge nounene woye.

⁴ Kala omunelao mokufinda. Kondjela oshili nelininipiko nouyuki. Okwooko kwoye kwokolulyo naku ku longe oilonga yoitilifa.

⁵ Oikuti yoye oi neememo. Oiwana tai wile koshi yoye; ovatondi vohamba otave i yashwa momitima.

⁶ Olukalwapangelo loye, Kalunga, otali kala po fiyo alushe nodibo yoye youhamba oyo odibo youyuki.

⁷ Ove u hole ouyuki ndele to tondo oumbudi; onghee hano Kalunga, Kalunga koye, e ku vaeka nomaadi ehafo u dule oovakweni.

⁸ Omudjalo woye aushe ou nedimba liwa lomirha naaloe naakassia; neshiko lokaxumbafeta otali ku hafifa meengulu da tungifwa ekipa leendjaba.

⁹ Ovana veehamba oukadona ove li mokati kovakainhu voye, va fimana; omumbada woye ota kala ofika kolulyo loye, a djala oulenga woshingoldo shomuOfir.

¹⁰ Omona okakadona, pwilikina, tala oku, ove endeka okutwi kwoye; xupula oshiwana sheni novambuleni.

¹¹ Ndele ohamba yoye, ngeenge ye ku hala, osheshi oyo omwene woye, opo nee ove linyongamena kuyo.

¹² Ovanhu vomuTirus otave uya, ve ku etele omilongelo, novanenenhu otava kendabala okulihokwifa kwoove.

¹³ Okakadona kohamba, aka ke li meni leumbo, kawa muko vene, momudjalo wako omo mwa tungilwa oingoldo;

¹⁴ oka dikwa oikutu ya tungilwa omaluvala, ndele taka twalwa kohamba; oukadona, eengoleka dako, nookahewa vako otave ka eta kwoove.

¹⁵ Otava endifwa nehafo neenghuwilili tava i mongulu yohamba.

¹⁶ Ounona voye ovamati otava ka kala ponhele yooxo, ndele to va ningi oidale moshilongo ashishe.

¹⁷ Edina loye nda hala oku li dimbulukifa komapupi aeshe okomesho; opo nee oiwana aishe yoilongo otai ke ku fimaneka fiyo alushe.