OMAPSALOME 44 - Ombibeli Iyapuki

Onghuwo yeongalo leendobwedihonde

Ounongoimbilo wOvakora, wa pewa enyakwa lolwiimbo.

¹ Kalunga, otwe shi uda nomatwi etu vene, ootate eshi ve shi tu hepaululila, eshi Ove wa longele oinenelonga mounyuni wavo, momafiku onalenale.

² Oove mwene neke loye wa tele mo ovapaani, ndele ootate, Oove we va twika meenhele davo; oiwana yoilongo owe i kombolola mo, ndele vo we va hapupalifila mo.

³ Osheshi omikonda davo, hado de va monififa oshilongo, nomaoko avo, hao e va longela efindano, ndelenee eke loye lokolulyo, nokwooko kwoye nouyelele woshipala shoye, oyo tuu, ye shi ninga; osheshi Ove we va hokwa.

⁴ Oove auke ohamba yange, Kalunga! Tumina Jakob ekwafo!

⁵ Nekwafo loye ohatu ka denga poshi ovatondi vetu, nomedina loye hatu ka lyataula ovakondjifi vetu.

⁶ Osheshi hauta wange handi lineekele, ndele hamukonda wange tau va taataifa nge;

⁷ ndelenee Oove tuu, we tu xupifa movakondjifi vetu, ndele Ove wa lengaifile ovatondi vetu.

⁸ Kalunga, Oye elitango letu omafiku aeshe, nedina loye ohatu li hambelele fiyo alushe. Sela

⁹ Ndelenee paife owe tu ekelashi nokuli, nowe tu tula melengwa, ndele ito ende vali nomatanga ovakwaita vetu.

¹⁰ Ove wa efa, tu shunifwe lwanima kovatondi vetu, novatondi vetu ova hakana oihakanwa.

¹¹ Owe tu yandja ko, ngaashi eedi tadi i koshidipaelo, ndele to tu halakanifa mokati koiwana yovapaani.

¹² Owa landifa po ovanhu voye oshimha, nomoku va landifa po kwoye ino limonena mo sha.

¹³ Owe tu etelifa odino kovashiinda vetu, nokwaava twa shaama navo, otwa ninga oiyolifa novadinwa kuvo.

¹⁴ Owa efa, fye tu ningwe etewo leengano dii komaludi ovapaani, nomokati koiwana ohatu pukapukilwa komitwe.

¹⁵ Alushe elengwa lange oli li komesho yange, nohoni oya pembifa oshipala shange,

¹⁶ eshi handi udu eyeelo neendjovo domasheko, naashi handi konenene omesho omutondi nomunanghone.

¹⁷ Ashishe eshi oshe tu hanga, nande fye mboli inatu ku dimbwa, noinatu enda nekonda mehangano loye.

¹⁸ Omitima detu inadi shuna monima, neemhadi detu inadi kanduka mo mondjila yoye,

¹⁹ ngeno opo u tu denge twa alamekwa pomikwena douvandje, ndele to tu dingililifa omulaulu wefyo.

²⁰ Ngeno kwa li twa dimbwa shili edina laKalunga ketu, ndele hatu nanene omake etu kukalunga kamwe ke lili;

²¹ ngeno Kalunga ine shi tenheneka poluhaela mbela? Osheshi Oye omukonakoni woiholekwa yomutima.

²² Ahowe, omolwoye tu li po hatu dipawa keshe efiku, ndee hatu talwa twa fa eedi dokudipawa.

²³ Duduluka po! Omwene, oshike to kofa ngaha? Penduka! Ino tu ekelashi fiyo alushe.

²⁴ Molwashike wa uvika oshipala shoye, ndele to dimbwa oluhepo letu nokufininikwa kwetu?

²⁵ Akutu, eemwenyo detu oda polimanena mondwi yedu, nomalutu etu okwa shatwa po, a lyamininwa poshi.

²⁶ Fikama u tu kwafe, Ove, tu kulila molwefilonghenda loye!