OMAPSALOME 42 - Ombibeli Iyapuki

Odjuulufi yokudjuulukwa Kalunga

Ounongoimbilo wOvakora, wa pewa enyakwa lolwiimbo.

¹ Ngaashi oholongo tai kwenene komatondokelo omeva, osho yo omwenyo wange tau ku djuulukwa, Kalunga.

² Omwenyo wange tau fi enota, otau djuulukwa Kalunga, Kalunga omunamwenyo. Onaini mbela handi fiki ko, ndi monike koshipala shaKalunga?

³ Omahodi ange okwa ninga eendja dange omutenya noufiku, osheshi efiku keshe otava pulapula nge tava ti: “Kalunga koye oku li peni paife?”

⁴ Mokudimbulukwa oinima ya pita, ohandi tileshi omwenyo wange; onda li handi ende mosheendo shongudu inene, hatu i nayo kongulu yaKalunga, twa hafa hatu imbi nokupandula mengafifi loshivilo.

⁵ Omwenyo wange, oshike wa polimanena ngaha, ndele to nhukauka meni lange uhe na efudepo? Teelela Kalunga! Osheshi natango tuu handi ke mu hambelela, Omuxupifi wange

⁶ naKalunga kange. Omwenyo wange otau nyika oufiye meni lange; onghee tuu ohandi ku dimbulukwa moshilongo shaJordan nokeemhunda daHermon nopomhunda Misar.

⁷ Meenghungulukilo doye oulemeva umwe otau ifana oulemeva ukwao; omakufikufi oye aeshe nomandwafuko oye okwe uya kombada yomutwe wange.

⁸ Nomutenya Kalunga oha yandje onghenda yaye, nomoufiku eimbilo laye otali kala pamwe naame, nohandi ilikana Kalunga kokukalamwenyo kwange.

⁹ Ohandi ti kuKalunga, emanya lange: “Omolwashike wa dimbwa nge? Molwashike ndi nokweenda noluhodi nokufininikwa komutondi wange?”

¹⁰ Onda fa nda tukwa momakipa ange, eshi ovanandubo naame va sheka nge, alushe tava ti kwaame: “Kalunga koye oku li peni paife?”

¹¹ Omwenyo wange, oshike wa polimana ngaha, ndele to nhukauka meni lange uhe na efudo? Teelela Kalunga! Osheshi natango tuu handi ke mu hambelela, Omuxupifi wange naKalunga kange.