OMAPSALOME 32 - Ombibeli Iyapuki

Onghuwo yomulidilululi

Ounongoimbilo waDavid.

¹ Omunelao ou omanyono aye a dimwa po nomatimba aye a tuvikwa.

² Omulumenhu omunelao oye ou Omwene ite mu valulile owii waye, nomomhepo yaye ngeenge kamu na ekonda.

³ Eshi nda li inandi hepaulula omatimba, omakipa ange a li a tekauka molweemhata domeni lange efiku alishe.

⁴ Osheshi omutenya noufiku, eke loye ola li la lyaminikila nge poshi; omungo wange owa kukutila mo, wa fa wa kukutikwa kokwenye. Sela

⁵ Opo nee onde ku hepaululila omatimba ange, noulunde wange inandi u holeka, nda tya: “Onda hala ndi hepaululile Omwene omanyono ange”; opo ove owa kufila nge po owii womatimba ange. Sela

⁶ Onghee hano omuyuki ne ku ilikane fimbo to hangika, opo ngeenge tape uya omayelu manene, ehe mu kungulule.

⁷ Oove oshihondamwa shange, to amene nge koudjuu; oto dingililifa nge nehafo lexupifo. Sela

⁸ Onda hala ndi ku longe, ndi ku udikile ondjila, ei u nokweenda nayo; onda hala ndi ku twe omayele; eisho lange tali ku pashukile.

⁹ Inamu fa eenghambe nomamula, aa ehe na eendunge, haa tulwa oitomo momakanya noikeshele, i deule ava vapwidi, va ehene kwoove.

¹⁰ Omahepeko ovahenakalunga oku li po mahapu; ndelenee ou te lineekele Omwene, ota dingililwa konghenda.

¹¹ Ovayuki nye, hafeleni mOmwene, nye kalukeni eenghalu, nyakukweni pombada, amushe nye ovayuki momutima.