OMAPSALOME 28 - Ombibeli Iyapuki

Eilikano nepandulo lomulyaameki kuKalunga

Epsalme laDavid.

¹ Omwene, ohandi ku ifana, Oove emanya lange: ino amuka nge, u kale wa mwena, opo ndiha fe ava hava i mombila, ngeenge to kala wa mwena filu.

² Uda ondaka yomailikano ange; ngeenge handi ku ifana u kwafe nge, eshi handi yelula omake ange mondingandinga youyapuki woye.

³ Ino faulila nge po pamwe novalunde nomumwe novakolokoshi, ava ve li po tava popifa mukwao nombili, mboli meni lavo tave mu diladilile owii.

⁴ Va alulila shi fike poilonga yavo nopoumbudi woiningwa yavo; va alulila shi fike pokunyona kwomake avo, Oove, u va pe ondjabi, ei va longela.

⁵ Osheshi ihava yavala oilonga yOmwene noshilongwa shomake aye; onghee nee ote ke va ngumauna po, ndele ite va tungulula vali.

⁶ Omwene na fimanekwe, osheshi eingido longhuwo yange okwe li uda.

⁷ Omwene Oye omupameki wange noshikelelifo shange; Oye nde lineekela momutima wange nonda mona ekwafo. Osho nee sha nyakula omutima wange, nohandi mu pandula neimbilo lange.

⁸ Omwene, Oye eenghono doshiwana shaye, ohotexupifo yomuvaekwa waye.

⁹ Xupifa oshiwana shoye, nangeka noupuna oshitukulwafyuululwa shoye; va lifa noku va humbata fiyo alushe.