OMAPSALOME 27 - Ombibeli Iyapuki

Omwene Oye ouyelele wange nexupifolao lange

Epsalme laDavid.

¹ Omwene, Oye ouyelele wange nexupifolao lange; Olyelye ndi tile ngeno? Omwene, Oye ohote yokukalamwenyo kwange; olyelye ta mbadapalifa nge vali?

² Eemhote ngeenge tadi totele nge, di pone nge po, ovayelani vange novatondi vange, ovo vene tava punduka ndele tava wile po.

³ Nande etanga lovakwaita nali dingilile nge, omutima wange itau tila sha; nande ondi shingilwe oita, natango ondi li po ndi neyombamo.

⁴ Shimwe ashike onde shi ehela kOmwene, nde shi hala unene: ngeno ame ndi kale mongulu yOmwene omafiku ange aeshe, okutala ouwanyenye wOmwene, ndi lishipulule nawa motembeli yaye.

⁵ Osheshi Ye ta holeke nge monduda yaye mefiku loixuna; ota amene nge neameno letwali laye, ndele ta yelulile nge kombada yemanya.

⁶ Osho hano omutwe wange otau ka lunda dovatondi vange ava va dingilila nge; ame nda hala okuyamba omayambo ekuwililo mongulu yaye, nda hala okwiimbila Omwene noku mu hambelela.

⁷ Omwene, uda, eshi handi ku ifana mokule! File nge onghenda, u nyamukule nge.

⁸ Eshi nda dimbulukwa ondaka yoye ei tai ti: “Nye kongeni oshipala shange”, omutima wange otau nyamukula: “Omwene, oshipala shoye nda hala oku shi konga.”

⁹ Ino holeka nge oshipala shoye, Ove ino kelela po omupiya woye nonya. Oove ekwafo lange shito, ino ekela nge shi u efe nge, Kalunga kexupifo lange.

¹⁰ Osheshi tate nameme, vo ova efa nge ngaho, ndelenee Omwene Oye ta kombelele nge.

¹¹ Omwene, longe nge ondjila yoye, u endife nge melila la yelakana molwovatondi vange.

¹² Ino yandja nge omuhanga kovataatai vange! Osheshi ovahepaululi voipupulu otava fikamene nge naau ta fulakata.

¹³ Iyaloo, ohandi itavele shili, nokutya handi ka mona ouwa wOmwene medu lovanamwenyo.

¹⁴ Teelela kOmwene! Kala wa yombama, omutima woye inau mbadapala; heeno, teelela kOmwene.